بھٹکل 21 / مئی (ایس او نیوز) مانسون کا موسم شروع ہونے سے پہلے ہی برسنے والی موسلا دھار بارش جہاں ایک طرف شدت کی گرمی سے پریشان لوگوں کے لئے راحت کا سبب بن گئی وہیں پر اس سے ہونے والا فصلوں کا نقصان کسانوں کے لئے پریشانیوں کا سبب بن گیا ۔
بھٹکل میں دو تین دنوں تک ہونے والی زبردست بارش کی وجہ سے دیگر فصلوں کے علاوہ تربوز کی فصل کو بھی نقصان پہنچا ہے ۔ بتایا جاتا ہے کہ اسارکیری کے پانڈو رنگا نائک اور سری کانت نائک نے سونار کیری میں واقع ایک ایکڑ پر پھیلی کھیتی میں ہر سال کی طرح امسال بھی تربوز کی فصل اگائی تھی جو کٹنے کے لئے تیار تھی ۔ لیکن اچانک شروع ہونے والی موسلا دھار برسات کی وجہ سے پوری فصل تباہ ہوگئی ہے ۔ ایک اندازے کے مطابق اس سے پانڈو رنگا اور سری کانت کو 80 ہزار روپے کا نقصان ہوا ہے ۔
دوسری طرف ماروکیری سے ملی اطلاع کے مطابق ماستی سوکرا گونڈا نامی شخص کا مکان برسات کی وجہ سے پوری طرح تباہ ہوگیا ۔ اس میں جانی نقصان تو نہیں ہوا لیکن مکان رہائش کے قابل نہیں رہا ۔ اسی طرح کائکینی میں شنکر مرڈیشور باکڑ نامی شخص کے مکان کو جزوی نقصان پہنچا ہے ۔ موڈ شیرالی میں شیومّا جٹّا نائک کا مکان پوری طرح گر گیا ہے ۔