عالمی شہرت یافتہ شاعر ڈاکٹر نواز دیوبندی کی دبئی آمد پر بھٹکل کے رحمت اللہ راہی صاحب کی رہائش گاہ پر شعری محفل
دبئی 20 مارچ (ایس او نیوز) اُردو ادب کی مایہ ناز شخصیت اور عالمی شہرت یافتہ شاعر و ماہر تعلیم ڈاکٹر نواز دیوبندی کی دبئی آمد پر ادب اور شاعری میں خصوصی لگاو رکھنے والے بھٹکل مسلم جماعت کے سابق جنرل سکریٹری جناب رحمت اللہ راہی نے اپنی رہائش گاہ پر ایک شعری نشست کا اہتمام کیا جس میں بھٹکل کے ذمہ داران اور شعر و شاعری میں دلچسپی رکھنے والے ادب نواز حضرات نے شرکت کرتے ہوئے پروگرام کو نہایت کامیاب بنایا۔
نشست میں ڈاکٹر نواز دیوبندی نے نئے اور تازہ کلام پیش کرتے ہوئے داد و تحسین حاصل کی ، اس موقع پرہندوستانی مسلمانوں کے تعلیمی تناظر میں موصوف کے ساتھ بھٹکل کے ذمہ داران نے تبادلہ خیال کرتے ہوئے مسلمانوں کی تعلیمی پسماندگی کو دور کرنے کے لائحہ عمل پر غور کیا۔
مولوی سید ہاشم ندوی کی تلاوت کلام پاک سے جلسہ کا آغاز ہوا، انہوں نے ہی مہمان شاعر کا تعارف بھی پیش کیا، مولوی عبدالمتین مُنیری نے افتتاحی کلمات پیش کئے۔موقع کی مناسبت سے جناب راہی صاحب اور مولوی سید ہاشم ندوی صاحب نے بھی اپنا کلام سناکر محفل کو مزید دلچسپ بنایا۔ جناب رحمت اللہ راہی صاحب نے اس موقع پر رات کی ضیافت کا بھی انتظام کیا تھا۔
بھٹکل مسلم جماعت دبئی کے صدرجناب اشفاق سعدا، جنرل سکریٹری جناب محمد یوسف برماور، کینرا مسلم خلیج کونسل کے صدر جناب عبدالقادر باشہ رکن الدین سمیت کافی دیگر ذمہ داران موجود تھے۔