بھٹکل 30/جولائی (ایس او نیوز) رابطہ تعلیمی ایوارڈ امسال مورخہ 2/اگست بروز جمعہ بعد نماز عصر ٹھیک 4:30 بجے اسلامیہ اینگلو اُردو ہائی اسکول میدان میں منعقد کیا گیا ہے جس میں بھٹکل کی مسلم کمیونٹی کے اسکولوں کے ہونہاربچوں کو رابطہ گولڈ میڈل ایوارڈ سے نوازا جائے گا۔ اس بات کی اطلاع رابطہ سوسائٹی کے صدر جناب زاہد رکن الدین نے دی۔ منگل کو رابطہ آفس میں منعقدہ پریس کانفرنس سے خطاب کرتے ہوئے انہوں نے کہا کہ ایس ایس ایل سی، سکینڈ پی یوسی اور ڈگری میں سب سے زیادہ مارکس حاصل کرنے والے بھٹکل کی مسلم کمیونٹی کے اسکولوں و کالجس کے ہونہار بچوں کو ایوارڈ دینے کا یہ سلسلہ گذشتہ 22 سالوں سے جاری ہے جس کے ذریعے مسلم بچوں کو تعلیم کے میدان میں آگے آنے اور اُن میں ایک دوسرے سے مقابلہ کرتے ہوئے آگے بڑھنے کی ترغیب دی جاتی ہے۔
جناب زاہد رکن الدین نے بتایا کہ بھٹکل کی مسلم کمیونٹی کے ہونہار بچوں کے ساتھ ساتھ بیرون بھٹکل میں ٹاپ کرنے والے اور گلف میں ٹاپ کرنے والے مسلم بچوں کو بھی رابطہ ایوارڈ سے نوازا جائے گا، اسی کے ساتھ ضلع اُترکنڑا میں سکینڈ پی یو سی میں ٹاپ کرنے والے کسی ایک اسٹوڈینٹ کو بھی رابطہ ایوارڈ سے نوازا جائے گا۔ انہوں نے یہ بھی بتایا کہ رابطہ کا ایک ایوارڈ کینرا مسلم کونسل کے حلقہ کے بھی ایک ہونہار اسٹوڈینٹ کو دیا جائے گا۔ ہونہار بچوں کو رابطہ گولڈ میڈل کے ساتھ ساتھ سرٹی فیکٹ سے بھی نوازا جائے گا۔ جناب زاہد رکن الدین نے بتایا کہ ٹاپ بچوں کے ساتھ ساتھ بیسٹ ٹیچر اور بیسٹ اسکول کو بھی خصوصی ایوارڈ سے نوزا جائے گا۔ جبکہ اس بار جملہ 22 ایوارڈ دیئے جائیں گے۔
پروگرام میں بھٹکل ڈی وائی ایس پی ویلنٹائن ڈیسوزا کی بھی تہنیت کی جائے گی جنہیں حال ہی میں پریسڈینٹ پولس ایوارڈ سے نوازا گیا تھا۔ جبکہ پروگرام میں مہمان خصوصی کے طور پر انجمن اسلام ممبئی کے صدر ڈاکٹر ظہیر قاضی کو مدعو کیا گیا ہے۔
انہوں نے عوام الناس سے درخواست کی ہے کہ اس پروگرام میں کثیر تعداد میں شریک ہوکر بچوں کی ہمت آفزائی فرمائیں اور پروگرام کو کامیاب بنائیں۔
پریس کانفرنس میں جناب زاہد رکن الدین کے ساتھ سکریٹری مولوی تنویر جوشیدی سمیت دیگر اراکین جناب عتیق الرحمن مُنیری، جناب جیلانی محتشم، جناب عبدالرحمن صدیقی، جناب عارف قاسمجی اور جناب ایس ایم افضل موجود تھے۔