بھٹکل:03؍دسمبر(ایس اؤ نیوز)اپاہجوں کو ایک بہتر زندگی گزارنے کے لئے حکومت ان کی طرف توجہ دے ، کیونکہ موجودہ دور میں اپاہجوں کی حالت سنگین ہے، ان کے مطالبات کو قبول کرتے ہوئے انہیں ایک بہتر زندگی فراہم کرنے کی مانگ لے کر اترکنڑا ضلع اپاہج اور سرپرست محاذ کمٹہ کی جانب سے بھٹکل تحصیلدار کی معرفت وزیرا علیٰ کو میمورنڈم سونپاگیا۔
میمورنڈم میں کہاگیا ہے کہ کئی اپاہج سرپرست نہیں ہونے کی وجہ سے بھیک مانگ کرزندگی گزار رہےہیں، حکومت کو چاہئے کہ وہ اپاہجوں کی مدد کرتے ہوئے انہیں ایک بہتر زندگی گزارنے میں معاون بنے۔ سال 2016کے اپاہج قانون کو نافذ کریں، اپاہجوں کا ماہانہ وظیفہ 5000ہزاروپئے تک کا اضافہ کریں، تعلیم یافتہ اپاہجوں کو سرکاری اور غیر سرکاری اداروں میں روزگار کے مواقع فراہم کریں، تمام شعبہ جات میں انہیں 5فی صد ریزرویشن دیاجائے۔ گرام پنچایت سے لے کر مرکزی حکومت تک اپاہجوں کو انتخاب لڑنے کےلئے بھی ریزرویشن دیں۔ اور مانگ کی گئی ہےکہ جو جسمانی طورپر 75فی صد اپاہج ہیں انہیں پرورش بھتہ دیں اور بس، ریل میں اپاہجوں اور معمر وں کے لئے مختص نشستوں کے بہتر استعمال کے لئے کارروائی کریں۔ اسی طرح انہیں ثقافتی ، فن کاری اور کھیل سرگرمیوں میں زیادہ شرکت کے لئے ترغیب دینے کا مطالبہ کیاگیا ہے۔ تحصیلدار وی پی کوٹرولی نے میمورنڈم وصول کیا۔ اس موقع پر حسن شبر آرمار، محمد فائق، حفظ الرحمن ، محمد طاہر، ضیاء مہک خلیفہ وغیرہ موجود تھے۔