بھٹکل،31؍اکتوبر (ایس او نیوز) بھٹکل منڈلّی کے درگا پرمیشوری مندر میں 18 اکتوبر کو دیوی کے جو زیورات چوری ہوئے تھے اس معاملے میں پولیس کی تفتیشی ٹیم نے23اکتوبر کو یلاپور کے رہنے والےمندر کے معاون پجاری ستیش بھٹ کو ساگر سے گرفتار کرلیا تھا۔
پولیس کا کہنا ہے کہ ملزم ستیش بھٹ نے تفتیش کے دوران نہ صرف زیورات چرانے کا اعتراف کیا بلکہ ان فائنانس ادارو کی بھی نشاندہی کردی جہاں پر اس نے ان زیورات کو گروی رکھ کر رقم حاصل کی تھی۔ ملزم کی فراہم کردہ اطلاع پر کارروائی کرتے ہوئے پولیس نے یلاپور میں واقع منی پورم فائنانس اور موتہوتھ فائنانس کے پاس گروی رکھے گئے جملہ 23 اقسام کے زیورات ضبط کرلیے۔ جن کا مجموعی وزن 513.8 گرام اور مالیت 24,15,340 روپے ہے۔
ملزم کی گرفتاری اور مسروقہ زیوارت کی ضبطی کی یہ کارروائی ضلع پولیس سپرنٹنڈنٹ شیواپرکاش اور بھٹکل اے ایس پی نکھل کی رہنمائی میں بھٹکل سرکل انسپکٹردیواکر کی قیادت میں تشکیل دی گئی تفتیشی ٹیم نے انجام دی جس میں بھٹکل دیہی پولیس اسٹیشن کے سب انسپکٹر ایچ او م پرکاش، بھٹکل ٹاؤن پی ایس آئی بھرت کمار، مرڈیشور پولیس اسٹیشن کے سب انسپکٹر رویندرا برادر اور دیگر عملے نے حصہ لیا۔