بھٹکل : ٹی ایم سی کی طرف سے ایم ایل اے کے ہاتھوں دیا گیا غریبوں کو گھروں کی تعمیر کا اجازت نامہ
بھٹکل ،16؍ اگست (ایس او نیوز) ٹاون میونسپل کاونسل کی طرف سے واجپئی اور بی آر امبیڈگر رہائشی اسکیم کے تحت جن مستحق بے گھر افراد کو گھر منظور ہوئے ہیں انہیں ایم ایل اے سنیل نائک کے ہاتھوں اجازت نامے تقسیم کیے گئے ۔
اس موقع پر خطاب کرتے ہوئے ایم ایل اے نے کہا کہ بھٹکل ٹی ایم سی کی طرف 70 سے زائد گھر منظور ہوئے ہیں ۔ جن لوگوں کو گھروں کی ضرورت ہے وہ اس کے لئے ضروری دستاویزات کے ساتھ ٹی ایم سی میں درخواست دیں ۔ حکومت ہر کسی کے لئے ایک چھت فراہم کرنے کے مقصد سے اس طرح گھروں کی تعمیر کو منظوری دے رہی ہے ۔ اب جن لوگوں کو گھر تعمیر کرنے کا اجازت نامہ دیا گیا ہے وہ لوگ جلد از جلد اپنے مکان کی تعمیر کا آغاز کریں اور اس اسکیم کا صحیح فائدہ اٹھائیں ۔
اس تقریب کی صدارت کر رہے ٹی ایم سی صدر پرویز قاسمجی نے کہا کہ جنہیں اجازت مل گئی ہے وہ لوگ بغیر کسی کوتاہی کے اپنے گھر تعمیر کر لیں اور اسکیم کا بھر پور فائدہ اٹھائیں ۔
ٹی ایم سی چیف آفیسر ایم کے سریش نے استقبال کرتے ہوئے کہا کہ ٹی ایم سی کی طرف سے 75 مکانات کا نشانہ طے ہوا ہے ۔ اس میں سے 35 مستحقین کو اجازت نامہ تقسیم کیا جا رہا ہے ۔ پھر کسی کو گھر کی ضرورت ہو تو جلد ہی اپنی درخواست جمع کروائیں ۔
اس موقع پر ٹی ایم سی نائب صدر محمد قیصر محتشم سمیت کاونسلرس ، افسران اور اسکیم سے مستفیض ہونے والے افراد موجود تھے ۔
