بھٹکل:02؍اکتوبر(ایس اؤ نیوز)تعلقہ انتظامیہ بھٹکل ، تعلقہ پنچایت بھٹکل ، بھٹکل میونسپالٹی اور جالی پٹن پنچایت کے اشتراک سے بابائے قوم مہاتماگاندھی کی 150ویں جینتی کےموقع پر تعلقہ کے سرکاری اسپتال کے صحن میں صفائی مہم منائی گئی تو تعلقہ کے مختلف مقامات پر سیاسی پارٹیاں، نجی ادارے اور تنظیموں ،اسکول و کالجس اور انفرادی طورپر بھی مختلف سماجی خدمت کے کاموں کو انجام دیاگیا۔

سرکاری اسپتال میں رکن اسمبلی سنیل نائک نے پروگرام کا افتتاح کرتے ہوئے صفائی مہم کی اہمیت بیان کی۔ پروگرام میں حاضر سبھی شرکاء نے صفائی کے متعلق حلف لیا۔ رکن اسمبلی نے سوچھتا ہی سیوا پروگرام کے لئے ہری جھنڈی دکھائی۔ اس موقع پر تحصیلدار وی پی کوٹرولی موجود تھے۔ بی ای اؤ منجی، بلدیہ چیف آفیسر دیوراج، جالی پنچایت چیف آفیسر وینوگوپال شاستری، میڈیکل آفیسر ڈاکٹر سویتا کامت، کے ایم اشفاق، عبدالرووف نائطے ، فیاض ملا سمیت کئی ذمہ داران موجود تھے۔ میڈیکل تعلیمی افسر ایریادیواڑیگا نے استقبال کرتے ہوئے شکریہ اداکیا۔

سنہیااسکول میں بھٹکل بلاک کانگریس کی جانب سے پروگرام : گاندھی جینتی کی مناسبت سے بھٹکل بلاک کانگریس شاخ کی جانب سے ساگر روڈ پر واقع کانگریس دفتر اور سنہیا خصوصی اسکول میں  گاندھی کی تصویر کو پھول مالاپہنائی گئی اور بچوں کے درمیان کتابیں، کاپیاں، مٹھائی وغیرہ کی تقسیم کی گئی ۔ اس موقع پر سابق رکن اسمبلی منکال وئیدیا، بلاک کانگریس صدر سنتوش نائک، ضلع کانگریس اقلیتی صدر عبدالمجید ، ایشورنائک، تعلقہ صدر منیر احمد، عبدالرحیم ، کے سلیمان سمیت کئی کانگریس لیڈران و کارکنان موجود تھے۔

اسی طرح  مرڈیشور کے لائنس کلب کی جانب سے بچوں میں ائکو فرنڈشپ بیگ کی تقسیم کاری کی گئی ۔ سینٹ میری سرین کالج برہماور، لائنس کلب مرڈیشور اور محکمہ ریلوے کےاشتراک سے ریلوے لائن کی صفائی کی گئی ۔ آر این شٹی کالج مرڈیشور کے طلبا نے کالج صحن میں صفائی کی ۔ بھٹکل کی گرو سدھیندراکالج کی طرف سے بھی کالج صحن میں طلبا نے صفائی مہم کو انجام دی۔