بھٹکل:11؍نومبر(ایس اؤ نیوز)بھٹکل سے قریب 25کلومیٹر دور  بحرہ عرب میں واقع  نیترانی جزیرے کا اسکوبا ڈایوینگ سیاحو ں کے لئے  پرکشش مرکز  بنتا جارہاہے،  یہاں صرف ایک برس میں ملک اور بیرون ملک سے تین ہزار سے زائد سیاح ڈایوینگ کا مزہ لے چکے  ہیں جس سے  یہ بات   واضح ہوتی ہے کہ  حال ہی میں شروع کی گئی اسکوبا ڈائیونگ سیاحوں کو اپنی طرف  راغب کرنے میں  کامیاب ہے۔

دراصل اسکوبا ڈایوینگ کے ذریعے گہرے سمندر میں بسی دنیا کا نظار ہ  کیا جاسکتاہے ، وقت کے چلتے اسکوبا ڈایوینگ یوروپی ممالک، تھائی  لینڈ، ملیشیا  اور دیگر ممالک میں  ایک آبی کھیل کے طورپر مشہور ہونےکے علاوہ متعلقہ ممالک کی سیاحت کو فروغ دینےمیں بھی اہم رول ادا کر رہا ہے۔ تھوڑا مہنگا ہونے کی وجہ سے  اسکوبا ڈاوینگ نامی  یہ آبی کھیل بھارت میں زیادہ مشہورنہیں تھا لیکن  حالیہ برسوں میں ملک کے معدودے چند ہی سمندری سواحل پر اسکوباڈاوینگ شروع کیا گیا ہے جس میں نیترانی جزیرے کا اسکوبا ڈاوینگ کئی جہت سے اہمیت رکھتاہے۔

مختلف  آبی حیاتی تنوع: بھٹکل سے قریب 25کلومیٹر کی دوری پر واقع نیترانی جزیرے کے دامن میں عجائبات کی ایک دنیا آباد ہے، موتیوں سے بھرے ہوئے  ذخیرے دیکھ سکتے ہیں، مختلف حیاتی تنو ع کے آبی جانور، کہیں اور نظر نہیں آنے والی رنگین مچھلیاں  یہاں موجود ہیں۔ ماحولیات کو لےکر بھی یہ بہت صاف شفاف ہے ، جزیرے کا پانی اتنا شفاف ہے کہ موتیاں بالکل واضح طورپر نظر آتی ہیں۔

اسکوبا ڈایوینگ کی شروعات : موسم باراں کے دوران اسکوباڈایوینگ کو روک دیاجاتاہے۔ اس کے بعد  اکتوبر کے پہلے ہفتہ سے ہی اسکوباڈایوینگ شروع کی جاتی ہے۔ رواں سال طوفان کی وجہ سے ابھی تک اسکوباڈایوینگ کی شروعات نہیں ہوسکی ہے، اور ایک ہفتہ کے بعد شروع ہونےکی منتظمین نے توقع ظاہر کی ہے۔

اسکوباڈایوینگ فیسٹول:اترکنڑا ضلع میں سیاحت کو فروغ دینے کےلئے ریاستی حکومت نے 2018کے جنوری میں نیترانی جزیرے پر بین الاقوامی اسکوباڈایوینگ فیسٹول کا انعقاد کیا تھا۔ اس کی طرف سیاحوں کی دلچسپی کو دیکھتے ہوئے ہرسا ل فیسٹول منانے کا تیقن دیاگیا تھا۔ لیکن 2019میں فیسٹول نہیں منایاگیا۔ 2020میں بھی فیسٹول کے انعقاد کو لےکر افسران نے شبہ جتایا  ہے۔ جنگلات سے بھرے ہوئے اترکنڑا ضلع میں روزگار اور سیاحت کے فروغ  کے لئے اسکوبا ڈایوینگ بہت اہمیت رکھتا ہے۔ لیکن سیاحت کی ترقی کو لےکر سرکارکی نظر اندازی کو لے کر عوام کی جانب سے اعتراضات بھی جتائے جارہے ہیں۔ کاروار  میں ضلعی سیاحت محکمہ کے نائب ڈائرکٹر ایس پرشوتم نے اس سلسلے میں بتایاکہ گزشتہ برس فیسٹول کے لئے حکومت کی طرف سے امداد منظور نہیں کی گئی تھی ، امسال بھی پیش کش کی گئی ہے، اگر امداد ملتی ہے تو اسکوبا فیسٹول منعقد کرنے کے تعلق سے فیصلہ لیا جائے گا۔ توقع کی جارہی ہے کہ  فیسٹول کے ذریعے جب اسکوبا ڈایونگ  کے تعلق سے عوام میں  معلومات فراہم کی جائے تو  مزید سیاح   اس طرف کا رُخ کرسکتے ہیں۔