کڑوین کٹہ ندی اور شرابی ندی کو صاف کرنے کا مطالبہ لے کر ناگریک ویدیکے نے اسسٹنٹ کمشنر کو دیا میمورنڈم
بھٹکل 8/مئی (ایس او نیوز) شہر کی کڈوین کٹہ اور شرابی ندی کو ڈریجنگ کے ذریعے صاف کرنے اور ندیوں کے تہہ میں پائے جانے والے کیچڑ کو نکالنے سمیت ندیوں میں پڑی ہوئی مٹی اور ریت کے ڈھیر وغیرہ کو نکالنے کا مطالبہ کرتے ہوئے بھٹکل ناگریک ویدیکے نے آج بدھ کو بھٹکل اسسٹنٹ کمشنر کے نام میمورنڈم پیش کیا۔
ویدیکے کے صدر دیویّا نائک نے بتایا کہ میڈیا میں کڈوین کٹہ ڈیم کے تعلق سے جو خبر شائع ہوئی ہے، اُس سے پتہ چلا ہے کہ کڈوین کٹہ ڈیم سوکھ گیا ہے اور سالہاسال سے وہاں ڈریجنگ نہ کرنے کی وجہ سے کڈوین کٹہ ندی میں ریت اور مٹی سرایت کر گئی ہے۔
دیویا نائک نے بتایا کہ کڑوین کٹہ ندی میں پانی کی کمی نہیں ہے مگر ندی میں ریت اور مٹی اتنی کثیر مقدار میں گری ہے کہ سالوں سے اُس کی صفائی نہ ہونے کی وجہ سے ندی میں پانی کی قلت پیدا ہوگئی ہے۔ انہوں نے اسسٹنٹ کمشنر پر زور دیا کہ وہ فوری طور پر اس طرف توجہ دے کر ندی کی صفائی کا کام شروع کرے اور شہر میں پینے کے پانی کی جو قلت پیدا ہوگئی ہے، اُسے دور کرے۔ اسی طرح انہوں نے کدرے بیرپا دیوستھان کے قریب سے گذرنے والی شرابی ندی کا بھی تذکرہ کرتے ہوئے اُس کی بھی صفائی کرنے کا مطالبہ کیا اور کہا کہ شرابی ندی میں بھی ریت اور مٹی گرنے سے ندی کی گہرائی کم ہوگئی ہے جس کے نتیجے میں شرابی ندی میں بھی پانی نہیں ہے۔ انہوں نے اے سی پر زور دیا کہ اگر اس تعلق سے فوری کاروائی نہیں کی گئی تو ناگریک ویدیکے احتجاج پر اُتر آئے گی۔
اس موقع پر ناگریک ویدیکے کے اعزازی صدر دتاتریا جے نائک سمیت دیگر ارکان موجود تھے۔ اسسٹنٹ کمشنر ساجد مُلا کی غیر موجودگی میں اُن کے معاون آفسر نے میمورنڈم وصول کیا ۔