بھٹکل 8 اپریل (ایس او نیوز) بھٹکل مسلم یوتھ فیڈریشن اور جماعت اسلامی ہند کی ہیومیانٹیرین ریلیف سوسائٹی (ایچ آر ایس ) کی جانب سے بھٹکل کے نوجوانوں کے لئے ایمرجنسی ٹریننگ ورکشاپ کا کامیاب انعقاد عمل میں آیا جس میں اُڈپی اور مینگلور سے خصوصی طور پر ایچ آر ایس کی دس رُکنی ٹیم نے بھٹکل پہنچ کر نوجوانوں کو بہترین انداز میں ٹریننگ فراہم کی۔
نیو شمس انگلش میڈیم اسکول میں بدھ کی شام سے منعقدہ ورکشاپ اتوار شام کو اختتام کو پہنچا، ورکشاپ میں بھٹکل کے مختلف اسپورٹس سینٹروں سے 36 نوجوانوں نے حصہ لیا اور ورکشاپ سے مکمل استفادہ کیا۔
پہلے دن نوجوانوں کو تربیت دیتے ہوئے جناب امیر صدیقی نے ایمرجنسی بالخصوص حادثات، غرقاب اور آگ کے حادثات سے لوگوں کو بچانے کے لئے کس طرح کام کرنا ہے اور متاثرہ لوگوں کو بچانے کے لئے کس طرح کے اقدامات کرنے ہیں، مکمل تفصیل بیان کی۔ نہایت دلچسپ انداز میں انہوں نے پروجیکٹرکی مدد سے نوجوانوں کو مختلف حادثات اور مختلف زخموں کے لئے کس طرح فرسٹ ایڈ دیا جانا چاہئے اس کے مختلف طریقے بیان کئے۔
دوسرے دن فجر کی نماز کے بعد نوجوانوں کو ورزش کرائی گئی، پھر نو بجے تک Interactive گیمس کا سیشن چلا، پھر دس بجے پائپ پر چڑھنے، رسی کےذریعے عمارت سے نیچے اُترنے اور اوپر چڑھنے سمیت سیڑھی کے ذریعے دوسروں کو بچانے کے طریقوں کی عملی مشق کرائی گئی۔ نوجوانوں کے لئے ورکشاپ نہایت کارآمد رہا۔ اس موقع پر ساحل آن لائن سے گفتگو کرتے ہوئے ٹریننگ میں حصہ لینے والے ایک نوجوان نے بتایا کہ بھٹکل کے نوجوان کسی بھی طرح کے حادثات کے موقع پر دوسروں کی مدد کرنے میں پیش پیش رہتے ہیں، مگر ہمارے پاس کوئی طریقہ کار نہیں تھا، آج ہمیں ٹریننگ سے پتہ چلا کہ ہمیں کس طرح دوسروں کی مدد کرنی چاہئے، کس طرح جانوں کو بچایا جاسکتا ہے، کس طرح فوری طور پر کسی بھی زخمی شخص کی مدد کی جاسکتی ہے۔ نوجوان نے فیڈریشن کے ذمہ داران پر زور دیا کہ ایسے کیمپ مزید رکھے جائیں اور ہر ماہ ، دو ماہ میں رکھے جائیں تاکہ زیادہ سے زیادہ نوجوان اس سے فائدہ اُٹھاسکیں۔
پروگرام میں بھٹکل مسلم یوتھ فیڈریشن کے صدر عزیز الرحمن رکن الدین ندوی نے بتایا کہ فیڈریشن میں تین شعبہ جات میں ایک سماجی خدمت شعبہ بھی ہے، جس کے لئے ہمارے نوجوانوں کو اس ورکشاپ کے ذریعے بہت ہی بہترین انداز میں ٹریننگ دی گئی اور ہمارے نوجوانوں نے بھی پوری دلچسپی کے ساتھ ٹریننگ میں حصہ لیا اور عملی مشق کے دوران بہترین مظاہرہ بھی پیش کیا۔ عزیز الرحمن نے بتایا کہ ہم آئندہ بھی اپنے نوجوانوں کو ایسے مختلف پروگراموں کے ذریعے ضروری تربیت فراہم کریں گے جس سے نوجوان قوم و ملت کی خدمت کرسکیں۔ اس موقع پر فیڈریشن کے مختلف ذمہ داران ، ایچ آر ایس کرناٹکا کے جنرل سکریٹری محمد مڈکارا اور اُترکنڑا کے ضلعی لیڈر رئیس شیخ سمیت کافی دیگرذمہ داران موجود تھے۔