بھٹکل: قائد قوم ڈاکٹر ایس ایم سید خلیل کی خدمات کے اعتراف میں 10 ڈسمبر کو دبئی میں ہوگا اہم تہنیتی پروگرام؛ دیا جائے گا افتخار قوم کا خطاب؛ ریلیز کی جائے گی وڈیو ڈوکومینٹری
بھٹکل 6/ڈسمبر(ایس او نیوز) بھٹکل مسلم خلیج کونسل (بی ایم کے سی) نے قائد قوم ڈاکٹر ایس ایم سید خلیل الرحمٰن کو افتخار قوم کے خطاب سے نوازتے ہوئے ان کی خدمات کو زبردست داد و تحسین سے نوازنے کا منصوبہ بنایا ہے۔
بھٹکل رابطہ سوسائٹی میں منعقدہ پریس کانفرنس سے خطاب کرتے ہوئے کونسل کے سکریٹری جنرل جناب عتیق الرحمن منیری نے بتایا کہ ڈاکٹر ایس ایم سید خلیل الرحمٰن کی خدمات کے اعتراف میں 10 ڈسمبر کو دبئی میں ایک اہم تہنیتی پروگرام منعقد کیا جارہا ہے جس میں ان کی شخصیت، ان کی زندگی کے نشیب و فراز اور قوم و ملت کے لئے پیش کی گئی ان کی خدمات کو اجاگر کرتے ہوئے ایک وڈیو ڈوکومینٹری ریلیز کی جائے گی۔ پروگرام دبئی کے گرینڈ آئی ٹی ہوٹل میں شام سات بجے شروع ہوگا۔ مہمان خصوصی کے طور پر بھٹکل کے قاضی صاحبان مولانا عبدالرب خطیبی ندوی اور مولانا خواجہ معین الدین اکرمی مدنی تشریف فرما ہوں گے۔ پروگرام کو دلچسپ بنانے کے لئے معروف نائطی شاعر جناب سید سمیع اللہ برماور بھی شریک ہوں گے۔ اس تقریب میں ڈاکٹر ایس ایم سید خلیل کو افتخارِ قوم کے اعزاز سے نوازا جائے گا۔
جناب عتیق منیری نے بتایا کہ پورا پروگرام یوٹیوب چینل پر لائیو نشر ہوگا اور اس کی لنک وہاٹس ایپ اور دیگر سوشیل میڈیا کے ذریعے وائرل کی جائے گی۔
پریس کانفرنس میں بھٹکل مسلم خلیج کونسل کے سکریٹری مولوی مولی کرانی اور خازن جیلانی محتشم بھی موجود تھے۔