بھٹکل مسلم جماعت کیرالہ کی جانب سے وائناڈ میں بی ایم جے ولیج کا شاندار افتتاح؛ روینو سکریٹری سمیت دیگر مہمانان نے کی بھٹکل کمیونٹی کی ستائش
وائناڈ 6/اکتوبر (ایس او نیوز) ریاست کیرالہ کے وائناڈ میں اتوار صبح بی ایم جے ولیج کا شاندار افتتاح عمل میں آیا جس میں شریک مہمانان نے بھٹکل کمیونٹی کی خدمات پر ذمہ داران کی خوب ستائش کی اور کہا کہ اس طرح کے سماجی کاموں میں بھٹکلی عوام ہمیشہ ہی متحرک ہوکر دوسروں کی مدد کرنے میں پیش پیش رہتے ہیں۔
ریاست کیرالہ کے محکمہ روینو کے پرنسپل سکریٹری اور کیرالہ ری بیلڈ چیف ایکزی کوٹیو آفسرڈاکٹروی وینو (آئی اے ایس) نے وائناڈ کے پنمارم میں ربن کاٹ کر بی ایم جے ولیج کا افتتاح کیا، اپنے خطاب میں انہوں نےبھٹکل کمیونٹی کے ساتھ ساتھ بی ایم جے ولیج اور بی ایم جے کلچرل سوسائٹی کے چیرمین جناب عبدالمجید جوکاکو کی خدمات کو بھی سراہا۔ انہوں نے کہا کہ وہ عبدالمجید کو قریب چالیس سالوں سے جانتے ہیں اور اُن کی سماجی خدمات سےبخوبی واقف ہیں، مگرمیں یہاں اُن کے تعلقات کی وجہ سے نہیں بلکہ عبدالمجید صاحب نے جس کاز کے لئے مجھے یہاں مدعو کیا، اُس کو دیکھتے ہوئے تشریف لایا ہوں۔ انہوں نے کہا کہ گذشتہ سال اگست میں ریاست میں جس طرح کا بھیانک سیلاب آیا اور پہاڑ کھسکنے کی وجہ سے آن کی آن میں 16000 مکانات مکمل طور پر زمین بوس ہوگئے، اُن خاندانوں کو واپس زندگی کی طرف لوٹانا آسان نہیں تھا، ایسے میں بہت سارےادارے سیلاب سے متاثرہ خاندانوں کی مدد کے لئے آگے آئے، کئی ایک اداروں نے اپنی جانب سے متاثرہ لوگوں کو مکانات تعمیر کرنے کا وعدہ کیا، مگر بھٹکل مسلم جماعت کیرالہ نے کوئی وعدہ نہیں کیا، کسی اخبار میں کوئی بیان نہیں چھپا، مگر خاموشی کے ساتھ متاثرہ علاقوں کا دورہ کرتے ہوئے پہلے مرحلے میں 16 مکانات تعمیر کرکے دئے ہیں۔ ایسے کاموں کی ستائش ہونی چاہئے ۔ انہوں نے کہا کہ کیرالہ کے سیلاب سے متاثرہ لوگوں کو واپس پٹری پر لانے میں آپ لوگوں کا بھی اہم رول ہے اور سرکار اس تعلق سے آپ کو ہرممکن تعاون دینے تیار ہے۔
وائناڈ کے سب کلکٹراور اے آئی ایس آفسراُمیش کے ہاتھوں دوسرے مرحلے کے14 مکانوں کا سنگ بنیاد رکھا گیا، اسی طرح بھٹکل کا قومی سماجی ادارہ مجلس اصلاح و تنظیم کے صدر جناب ایس ایم پرویز کے ہاتھوں بی ایم جے کلچرل سوسائٹی کی عمارت کا سنگ بنیاد رکھا گیا۔ اس موقع پر دونوں نے اپنے اپنے تاثرات پیش کئے۔
بی ایم جے ولیج کے چیرمین عبدالمجید جوکاکو نے مہمانوں کا استقبال کرتے ہوئے پروگرام کی صدارت بھی کی۔ انہوں نے بتایا کہ سیلاب سے جو زبردست تباہی مچی تھی، اُس کو دیکھتے ہوئے ہم نے فوری طور پر سروے کرتےہوئے متاثرین کو ابتدائی امداد پہنچائی، بعد میں حالات کو دیکھتے ہوئے ہماری جماعت نے بے حد مستتحق خاندانوں کو مکانات تمیرکرکے دینے کا فیصلہ کیا، انہوں نے بتایا کہ متاثرین کو امداد فراہمم کرنے جب ہم نے بھٹکل کی مختلف جماعتوں سے اپیل کی تو مجلس اصلاح و تنظیم کی جانب سے 35 لاکھ کی خطیر رقم امداد میں دی گئی، دیگر مقامی اور اطراف کے کافی لوگوں نے بھی اپنی جانب سے مالی تعاون کیا جس کے نتیجے میں 16 مکانات تعمیر کئے گئے ہیں، اب ہمیں مزید 14 مکانات تععمیر کرنے ہیں ساتھ ساتھ ایک کلچرل سینٹر بھی تعمیر کرنا ہے جس کے لئے مزید مالی تعاون کی ضرورت ہے۔
وائناڈ پنچایت صدرمحترمہ کے بی نسیمہ، سائن کے ایکزی کوٹیو ڈائرکٹرراشید غزالی، انڈین نوائط فورم کے نائب صدر اور بھٹکل مسلم جماعت مینگلور کے صدر جناب ایس ایم ارشد، بھٹکل مسلم جماعت کیرالہ کے صدر محمد جعفر مصباح، سکریٹری فیاض احمد مصباح، پنمارم کے ممبر آف بلاک پنچایت جینتی راجن، گرام پنچایت ممبر مارٹن، پروگرام کمیٹی چیرمین محمد جابرو دیگرکافی ذمہ داران موجود تھے، مہمانان کے ہاتھوں تمام 16 تیار شدہ مکانوں کی چابیاں متاثرین کے خاندانوں کو تقسیم کی گئیں۔ کئی ایک نے اس دوران اپنے اپنے تاثرات پیش کرتے ہوئے بھٹکل کمیونٹی اور بھٹکل مسلم جماعت کیرالہ کی خدمات کی سراہنا کی۔
پروگرام کا آغاز کالی کٹ کے مفتی محمد اٰمین کی تلاوت مع ترجمہ سے ہوا تھا جبکہ مولانا محمد راشد کی کلمہ تشکر پر پروگرام اختتام کو پہنچا۔ اس موقع پر بھٹکل سے کئی ایک ذمہ داران بھی موجود تھے، جبکہ بھٹکل مسلم جماعت کیرالہ کے ذمہ داران بھی کثیر تعداد میں موجود تھے۔