بھٹکل میونسپالٹی انتخابات میں ووٹروں کا مایوس کن مظاہرہ؛ صرف 50.74 فیصد پولنگ ہوئی درج
بھٹکل 29/مئی (ایس او نیوز) بھٹکل میونسپل کونسل کے 11 وارڈوں کے لئے آج بدھ کو ہوئے انتخابات میں صرف 50.74 فیصد پولنگ ریکارڈ کی گئی۔ اس موقع پر بعض جگہوں پر معمولی لفظی جھڑپوں کو چھوڑیں تو تمام وارڈوں میں پولنگ پُرامن رہی اور اُمیدواروں کے حمایتی اپنے اپنے اُمیدواروں کو جیت دلانے انتھک محنت اور کوشش کرتے نظر آئے۔
رمضان کے مبارک ایام میں روزوں کے ساتھ ساتھ شدت کی گرمی کے چلتے ووٹرس زیادہ تر پولنگ کرنے گھروں سے ہی باہر نہیں نکلے، البتہ بعض اُمیدواروں نے اپنے علاقوں میں ووٹروں کو پولنگ بوتھ پہنچانے کے لئے سواری کا انتظام کیا تھا اس کے باوجود پولنگ بے حد کم ہی رہی۔
صبح ٹھیک سات بجے تمام 13 پولنگ بوتھوں پر انتخابی کاروائی شروع ہوئی، ابتدا میں ووٹروں کی تعداد نہ کے برابر رہی مگر صبح دس بجے سے دوپہر ایک بجے کے دوران پولنگ بوتھوں پر تھوڑی بہت ہلچل نظر آئی، مگر پھر وقت گذرنے کے ساتھ ہی ووٹروں میں کمی آتی چلی گئی۔
بھٹکل تحصیلدار اور انتخابی آفسر این بی پاٹل نے انتخابات کے پرامن اختتام کے بعد بتایا کہ جملہ 50.74 فیصد پولنگ ریکارڈ کی گئی ہے، سب سے زیادہ پولنگ وارڈ نمبر 23 میں ریکارڈ کی گئی جہاں 68.13 فیصد پولنگ ہوئی اور وارڈ نمبر 18 میں سب سے کم یعنی 29.10 فیصد پولنگ ریکارڈ کی گئی۔
خیال رہے کہ بھٹکل کے جملہ 23 وارڈوں میں سے 12 وارڈوں میں اُمیدوار بلامقابلہ پہلے ہی منتخب ہوچکے ہیں آج بقیہ 11 وارڈوں کے لئے انتخابات ہوئے تھے۔ پولنگ کے موقع پر پولس کی جانب سے مناسب حفاظتی انتظامات کئے گئے تھے۔
آج ہوئی پولنگ میں کونسے وارڈ میں کتنی پولنگ ہوئی، اُس کی تفصیلات ذیل میں پیش کی جارہی ہے۔