بھٹکل میونسپالٹی میں صفائی کرمچاری پرہاتھ اُٹھانے کا الزام؛ کام بند کرکے کیا گیا احتجاج؛ صلح صفائی کے بعد معاملہ حل
بھٹکل 19/جولائی (ایس او نیوز) بھٹکل ٹائون میونسپالٹی کے ایک صفائی کرمچاری پر میونسپالٹی کے ہی ایک آفسر کے ذریعے ہاتھ اُٹھانے کا الزام عائد کرتے ہوئے سبھی صفائی کرمچاریوں نے آج جمعرات کو احتجاج کرتے ہوئے کام کاج بند کردیا۔ مگر قریب تین گھنٹوں بعد آپسی صلح صفائی کے بعد معاملہ حل کرلیا گیا۔
بتایا گیا ہے کہ آج صبح گنپتی منگلا کورار نامی ایک ورکر نے بیمار ہونے پر چھٹی مانگی تھی، جس پر جونئیر ہیلتھ آفسر کے ساتھ لفظی جھڑ پ ہوئی جس کے بعد متعلقہ آفسر نے گنپتی کو تھپڑ ماردیا، اسی بات کو لے کر سبھی صفائی کرنے والے اہلکار احتجاج پر اُترآئے اور سبھی کرمچاریوں نے کام کاج بند کردیا۔ ان کا مطالبہ تھا کہ متعلقہ آفسر کے خلاف کاروائی کی جائے۔
کافی دیر تک صفائی کرمچاریوں نے میونسپل چیف آفسر (انچارج) وینکٹیش نائوڈا کا گھیرائو کرتے ہوئے اُن سے متعلقہ آفسر کی شکایت کرتے ہوئے کاروائی کی مانگ کی اور بتایا کہ متعلقہ آفسر اس سے پہلے بھی ورکروں کے ساتھ بدتمیزی کے ساتھ پیش آتا رہا ہے، لہٰذا اُس آفسر کو ان کے سیکشن سے ہٹادیا جائے۔
اس تعلق سے کرمچاریوں نے بھٹکل ٹائون پولس تھانہ پہنچ کر شکایت درج کرنے کی بھی کوشش کی ، مگر بعد میں بتایا گیا ہے کہ صلح صفائی کرتے ہوئے معاملے کو نپٹادیا گیا ہے ۔
بھٹکل پولس انسپکٹر گنیش نے بتایا کہ صفائی کرمچاری پولس تھانہ میں شکایت درج کرنے پہنچے تھے، مگر بعد میں میونسپل کے کسی آفسر کا کال آنے کے بعد شکایت درج کئے بغیر ہی واپس چلے گئے۔ انسپکٹر کے مطابق دونوں نے ایک دوسرے پر ہاتھ اُٹھایا تھا۔ انہوں نے بتایا کہ اس تعلق سے کوئی بھی معاملہ فی الوقت درج نہیں ہوا ہے۔
