بھٹکل سلطان اسٹریٹ میں میونسپل حکام کی عوامی میٹنگ؛ عوام نے پیش کئے علاقہ کے کئی مسائل؛ منگل کو رابطہ ہال میں ہوگی میٹنگ
بھٹکل 7 ستمبر (ایس او نیوز) سلطان اسٹریٹ میں سلطان ویلفیر اسوسی ایشن ہال میں بھٹکل میونسپل آفسران نے میونسپل وارڈ نمبر 13 اور 17 کے عوام کے مسائل جاننے اور اسے حل کرنے ایک عوامی میٹنگ منعقد کی جس میں عوام الناس نے اپنے اپنے علاقہ کے کئی ایک مسائل بیان کرتے ہوئے اسے حل کرنے کی درخواست کی۔
سلطان اسٹریٹ کے میونسپل کونسلر جناب عبدالعظیم کی صدارت میں منعقدہ میٹنگ میں عوام نے ڈرینیج کے مسائل، چمبرس خراب ہونے، اسٹریٹ لائٹ، وغیرہ کے ساتھ ساتھ صفائی ستھرائی پر توجہ دینے کی بات کہی۔ اسی طرح ڈرینج بلاک ہونے سے علاقہ کے کنووں میں گھٹر کا پانی جمع ہونے اور پینے کے پانی کے لئے ہورہی دشواریوں کو بیان کیا۔ عوام نے پرانی فش مارکٹ کو فوری طور پر نئی ہائی ٹیک فش مارکٹ میں منتقل کرنے کا بھی مطالبہ کیا ساتھ ساتھ عوام نے مٹن مارکٹ کے قریب پبلک ٹوائلٹ تعمیر کرنے کی بھی درخواست کی۔
میونسپل چیف آفسر دیوراج نے تمام مسائل پر غور کرنے اور حل کرنے کی ہرممکن کوشش کرنے کا تیقن دیا، انہوں نے اس دوران سلطان ویلفیر اسوسی ایشن کے تعاون سے علاقہ کے عوام کو فری انٹی جن کوورونا ریپیڈ ٹیسٹ کرانے پروگرام رکھنے کی درخواست کی۔ انہوں نے کہا کہ اب رپورٹ پوزیٹیو آنے کی صورت میں گھر پر ہی کورنٹائن کرنے کی اجازت ہے اس لئے رپورٹ کورونا پوزیٹیو آنے پر کسی طرح کا خوف کھانے کی ضرورت نہیں ہے۔ انہوں نے کہا کہ اگر سلطان اسٹریٹ کے عوام سہولت فراہم کریں تو یہاں میونسپالٹی کی جانب سے ریپیڈ ٹیسٹ کی سہولت فراہم کی جاسکتی ہے اور عوام بے خوف ہوکر مفت میں اپنا کورونا ٹیسٹ کرواسکتے ہیں۔ جناب عبدالعظیم نے اس تعلق سے علاقہ کے ذمہ داران سے رائے مشورہ کرنے کے بعد جواب دینے کی بات کہی۔
بھٹکل میونسپالٹی کی جانب سے ہیلتھ انسپکٹر سوجیا، وینو گوپال شاستری، اُمیش و دیگر موجود تھے۔
خیال رہے کہ میونسپل حکام کی جانب سے 8 ستمبر کو وارڈ نمبر 1 اور 2 کے عوام کے لئے نوائط کالونی رابطہ ہال، 9 ستمبر کو مخدوم کالونی اسپورٹس سینٹر میں وارڈ نمبر 3، 4، 8 اور 9 کے عوام کے لئے، 10 ستمبر کو چن پٹن ہنومنتھ دیوستھان کے میٹنگ ہال میں وارڈ نمبر 15، 19، 22، 23 کے عوام کے لئے ، 11 ستمبر کو لبیک نوائط اسپورٹس کلب میں وارڈ نمبر 12، 14 اور 18 کے عوام کے لئے، 14 ستمبر کو سونارکیری میٹنگ ہال میں وارڈ نمبر 10 اور 11 کے عوام کے لئے، 15 ستمبر کو بندر روڈ سکینڈ کراس میں واقع گونڈا میٹنگ ہال میں وارڈ نمبر 5 اور 6 کے عوام کے لئے، 16 ستمبر کو شوکت علی روڈ اسپورٹس کلب میں وارڈ نمبر 20 اور 21 کے عوام کے لئے، 18 ستمبر کو ناگپا نائک روڈ میں وارڈ نمبر 7 کے عوام کے لئے اوروارڈ نمبر 16 کے عوام کے لئے 19 ستمبر کو تکیہ اسٹریٹ میں عوامی میٹنگ کا انعقاد کیا گیا ہے۔تمام جگہوں پر شام چار بجے میٹنگ شروع ہوگی۔ متعلقہ علاقوں کے عوام سے درخواست کی گئی ہے کہ وہ اپنے اپنے علاقہ میں منعقد ہونے والی میٹنگوں میں شریک ہوتے ہوئے اپنے اپنے مسائل حکام کے سامنے پیش کریں۔
