بھٹکل،7؍نومبر (ایس او نیوز ) دیکھا گیا ہے کہ تمام تر جدید سہولتوں کے باوجودبلدی اداروں کے لئے کچرا نکاسی ایک سنگین مسئلہ بنا ہواہے۔ ساتھ ہی اس کو حل کرنے کے لئے نت نئے طریقوں کو بھی مسلسل آزمایا جارہا ہے۔
کچرا نکاسی کا انتظام : بھٹکل ٹاؤن میونسپل کاؤنسل کے حدود میں بھی گھر گھر سے کچرا جمع کرکے اس کی نکاسی کا بڑی حد تک ایک کامیاب پروگرام نافذ کیا گیا ہے۔لیکن کچھ بلدیہ ملازمین کی کوتاہی اورکچھ عوام کی غیر ذمہ داری اور بے حسی کی وجہ سے آج بھی بعض رہائشی مقامات پر کچروں کاڈھیر پڑا نظر آتا ہے۔اور اس میں زیادہ تر مرغیوں اور دیگر جانوروں کے ذبیحہ کے بعد ان کے فضلات اور کچرے کے تھیلے یہاں وہاں پر پھینکنے سے عوام کو بڑی دشواریوں کا سامنا کرنا پڑ تا ہے۔ اس کے علاوہ اس کچرے کی وجہ سے سڑکوں پر ہر طرف آوارہ کتوں کا ہی راج نظر آتا ہے۔دوسری طرف کوے ، چیل اور کتے یہاں وہاں پھینکے گئے گوشت اور جانوروں کے باقیات کو بعض دفعہ مذہبی مقامات پر لے جاکر چھوڑ دینے سے فرقہ وارانہ تناؤ کی صورت بھی بارہا پیدا ہوچکی ہے۔
گوشت کی دکانیں اور کچرا: بھٹکل میں اس وقت 25سے زیادہ مرغیوں کی اور 10 کے قریب بیف اور مٹن کی دکانیں ہیں ۔ ٹی ایم سی کی طرف سےدوسرے گھریلو کچرے کے ساتھ اس گوشت کے کچرے کو بھی ٹھکانے لگانے کا پہلے سے انتظام تھا مگر کچرا ڈھونے اور اس کو وقت پر ٹھکانے لگانے کے مسائل اپنی جگہ تھے۔ کیونکہ مرغی اور گوشت کی دکانوں سے روزانہ 3سے 4ٹن کچرا نکلتا ہے اور اس کو کامیابی سے ٹھکانے لگانا بلدیہ ملازمین کے لئے ایک دردسر بناہوا تھا۔
کیا ہےنیا انتظام! : اب اس کو بہت ہی بہتر طریقے سے ٹھکانے لگانے بلکہ اس کچرے کو بھی کارآمد بنانے کا طریقہ بھٹکل ٹی ایم سی نے اپنایا ہے۔اور ایک ایسا قدم اٹھایا ہے جو پورے ضلع کے لئے ہی نہیں بلکہ ملک کے لئےبھی ایک قابل تقلید نمونہ ہوسکتا ہے۔اس نئے سسٹم کے تحت بھٹکل ٹی ایم سی اور منگلورو بیکمپاڈی کی ’سوزاٹریڈنگ کمپنی‘کے بیچ ایک معاہدہ ہوگیا ہے۔ اس معاہدے کے مطابق سوزا کمپنی والے کچرا جمع کرنے کے لئے مرغیوں اور گوشت کی دکانوں کو اپنے صندوق فراہم کریں گے ۔ اس میں دکانداروں کو صرف اور صرف ذبیحہ کے باقیات اورفضلات رکھنے ہونگے ۔ ہر دن صبح اور شام میں دو مرتبہ بلدیہ کے ملازمین ان دکانوں پر پہنچ کر صندوق اکٹھا کریں گے اور شام 4 بجے سوزا کمپنی کی طرف سے آنے والی گاڑی پر روانہ کریں گے اور یہ گاڑی پورا 3 تا 4 ٹن کچرا منگلورو میں واقع اپنی فیکٹری میں لے جائے گی۔
کیا کرتے ہیں اس کچرے کا؟!: سوزا ٹریڈنگ کمپنی میں جانوروں کے باقیات اور فضلات کو خشک کرکےاس میں کچھ ضروری کیمیکلس ملاتے ہوئے اس کا سفوف (پاؤڈر) بناکر پیک کیا جاتا ہے۔پھر اسےپالتو کتوں کےلئے غذا (فیڈ) کے طور پر مارکیٹ میں فروخت کیا جاتا ہے۔گزشتہ 5سال سے سوزا کمپنی اس کاروبار میں مصروف ہے اور ان کا یہ کاروبار روز افزوں ترقی پر ہے۔اب کمپنی اس طرح گوشت کے کچرے سے خنزیر اوردوسرے پالتو پرندوں کے لئے غذا تیار کرنے کا پروجیکٹ بنارہی ہے۔
اس طرح بھٹکل ٹی ایم سی نے سوزا کمپنی کے ساتھ مل کر کچرا نکاسی کا ایک بہترین اور ماحولیات کے نقطہ نظر سے بھی مفیدترین طریقہ اپنایا ہے جس کے بارے میں توقع کی جاسکتی ہے کہ وہ جلد ہی پورے ضلع شمالی کینرا میں مقبول ہوسکتا ہے۔
ٹی ایم سی کی ہیلتھ آفیسر سوجیا سومن نے بتایا کہ ہم نے سوزا کمپنی کے ساتھ معاہدہ کرتے ہوئے گوشت کاکچرا ٹھکانے لگانے کا جو راستہ ڈھونڈ نکالا ہے اس کے تعلق سے ہمیں امید ہے کہ ہماری یہ کوشش ضرور کامیاب ہوگی اور ا س کے بہترین نتائج نکلیں گے۔ اگر بھٹکل میں یہ منصوبہ کامیاب ہوتا ہے تو پھر دوسرے علاقوں کے لئے یہ ایک مثال بن سکتا ہے اور کہا جاسکتا ہے کہ بھٹکل کی طرف دوسرے علاقوں میں بھی اس کی تقلید کی جاسکتی ہے۔