بھٹکل میں لاک ڈاون کے بعد آج سے مسجد عام لوگوں کے لئے کی گئی اوپن؛ کورونا سے بچنے مسجدوں میں خصوصی انتظامات
بھٹکل 9/ جون (ایس او نیوز) حسب اعلان آج منگل سے بھٹکل کی تمام مساجد عام لوگوں کو نماز پڑھنے کے لئے کھول دی گئیں جس کے ساتھ ہی مسلمانوں نے مسجدوں میں پورے جوش و جذبے کے ساتھ نماز میں شریک ہوتے نظر آئے۔
کورونا وباء کے چلتے قریب ڈھائی ماہ تک مسجدوں کو بند رکھا گیا تھا اور لوگوں کو گھروں میں ہی نماز پڑھنے کی تاکید کی گئی تھی، اسی طرح رمضان کی تراویح بھی مساجد میں نہ ہوسکی ساتھ ساتھ جمعہ نماز بھی مساجد میں نہیں پڑھی جاسکی تھی،
اب بھٹکل میں ویسے تو کورونا وباء پر قابو پالیا گیا ہے مگر ریاست میں کورونا سے متاثرہ لوگوں کی تعداد دن بدن بڑھتی جارہی ہے، پڑوسی ضلع اُڈپی پوری ریاست کرناٹک میں سب سے زیادہ کورونا سے متاثرہ ضلع قرار دیا گیا ہے، ایسے میں ایک طرف کورونا کو بھٹکل میں واپس آنے سے روکنا ہے، وہیں مسجدوں کو عوام کے لئے کھولنے پر اُن تمام اُمور پر توجہ دینا ضروری ہے کہ بھٹکل میں کسی بھی حال میں کورونا واپس اپنا سر نہ اُٹھا سکے۔
کورونا سے اپنی اور دوسروں کی حفاظت کے لئے تقریبا تمام مسجدوں میں متعلقہ مسجد انتظامیہ کی طرف سے مختلف انتظامات کئے گئے ہیں، گھر پر وضو کرکے مسجد میں نماز کے لئے آنے کے ساتھ ساتھ مسجد میں داخل ہونے سے پہلے مسجدوں کے باہر داخلی دروازے کے قریب صابون اور پانی کا انتظام کیا گیا ہے کہ ہر کوئی اپنے ہاتھ کو صابون سے دھو کر ہی مسجد میں داخل ہوں، مسجد کے اندر ایک ایک مصلیٰ کا فاصلہ رکھتے ہوئے نماز پڑھنے کا اہتمام کیا گیا ہے۔ کچھ مساجد میں صفوں میں ہی ایک دوسرے سے فاصلہ برقرار رکھتے ہوئے نماز پڑھنے کے لئے نشانیاں لگائی گئی ہے تو بعض مساجد میں الگ ہی طرح کے مصلوں کا انتظام کیا گیا ہے، بعض مساجد میں پلاسٹک تاڈپدری کا استعمال کیا گیا ہے تو بعض مساجد میں فرش سے کارپیٹ نکال دئے گئے ہیں۔
مسجدکے اندر داخل ہوتے وقت انتظامیہ کی طرف سے نوجوان والنٹیرس کو تعینات کیا گیا ہے جو ہر مسجد کے اندر داخل ہونے والوں کی تھرمل اسکیننگ کرتے ہیں۔
نماز میں شریک ہونے والوں سے کہا گیا ہے کہ وہ اذان کے فوری بعد مسجد میں آئیں اور نماز پڑھتے ہی چلے جائیں، فی الحال مسجد میں بیٹھ کر قران پڑھنے کی بھی اجازت نہیں ہے، ساتھ ساتھ کسی بھی چیز کو چھونے سے بھی احتراز کرنے کے لئے کہا گیا ہے۔