بھٹکل عفان جبالی قتل معاملے کی مکمل جانچ کا مطالبہ لے کر والد نے ڈپٹی کمشنر کی معرفت گورنر کو سونپامیمورنڈم
بھٹکل:26؍اکتوبر(ایس اؤ نیوز)گزشتہ سنیچر 19اکتوبر کو موگلی ہونڈا کے مکین عفان جبالی قتل معاملےکی شفافیت کے ساتھ جانچ مکمل کرنے کا مطالبہ لےکر مقتول کے والد محمد علی جبالی و دیگر نے سنیچر کو اترکنڑا ڈپٹی کمشنر ڈاکٹر ہریش کمار کی معرفت ریاستی گورنر کو میمورنڈم سونپا۔
میمورنڈم میں تحریرکیاگیا ہے کہ ملزم اقبال گزشتہ تین مہینوں سے ہوٹل میں قیام کرنے کی اطلاعات ہیں اس کا پس منظر کیاہے اور اس کی سرگرمیاں کیا تھیں اس کو ظاہر کریں۔ جس ہوٹل میں قتل ہوا، اُس ہوٹل کے مالک اور کلیدی ملزم اقبال شیخ کے درمیان کیا تعلقات ہیں پتہ لگائیں، جس دن واردات کو انجام دیاگیا اسی دن ہوٹل کے کمرےمیں میراے بیٹےکی چیخ پکار ہوٹل کے باہر تک سنائی دی تھی ، لیکن ہوٹل میں موجود لوگوں کو کیوں معلوم نہیں ہوسکا، قتل کے دن ہوٹل کو کون کون لوگ آئے تھے اور چلے گئے اس تعلق سے پوری شفافیت کے ساتھ جانچ کی جائے۔ ہوٹل میں نصب شدہ سی سی ٹی وی ، ہوٹل کےکمروں کو کرایہ پر لینےکے لئے دئیے گئے دستاویزات کے متعلق شبہ جتایاگیا ہے۔ ڈی سی ڈاکٹر ہریش کمار نے میمورنڈم وصول کیا۔ اس موقع پر کے ایم اشفاق، سید علی، کے ایم شریف، ابوبکر وغیرہ موجود تھے۔