بھٹکل رکن اسمبلی کی طرف سے سرکاری اسپتال کو ایمبولینس کا عطیہ
بھٹکل 9 مئی (ایس او نیوز) بھٹکل رکن اسمبلی سُنیل نائک نے اپنی طرف سے بھٹکل سرکاری اسپتال کو ایک اسی طرح ہوناور سرکاری اسپتال کے لئے بھی ایک ایمبولنس عطیہ دیا جس میں اکسیجن کی بھی سہولیات دستیاب ہیں۔
بھٹکل تعلقہ اسپتال میں ربن کاٹ کر ایم ایل اے نے ہی ایک ایمبولنس کا افتتاح کیا ، پھر گفتگو کرتے ہوئے سنیل نائک نے کہا کہ کورونا وباء کے چلتے عوام ہر طرف پریشان ہیں، لوگوں کی طرف سے شکایتیں موصول ہورہی تھی کہ ایمرجنسی کے موقع پر سرکاری ایمبولنس نہیں مل رہی ہے، کوویڈ کے مریضوں کو اسپتال جانا ہو، کورونا کی جانچ کرانا ہو، ایسے تمام موقعوں پر اس ایمبولنس کی خدمات حاصل کی جاسکتی ہے۔ انہوں نے کہا کہ لاک ڈاون کی بنا پر لوگوں کو اسپتال جانے میں دشواریاں پیش آرہی تھی، مجھے اُمید ہے کہ اس ایمبولنس سروس کی شروعات کے ساتھ ہی عوام کو آئندہ ایسا کوئی مسئلہ نہیں ہوگا ۔ سنیل نائک نے کہا کہ میں چاہتا ہوں کہ میرے اسمبلی حلقہ یعنی بھٹکل اور ہوناور کےعوام ان ایمبولنس خدمات سے فائدہ اُٹھائیں۔ انہوں نے کہا کہ یہ ایمبولنس 24X7 دستیاب رہے گی ۔ ایم ایل اے نے عوام الناس سے درخواست کی کہ انہیں جب بھی ایمبولنس کی ضرورت ہو تو موبائل نمبر 9741623913 اور 9482823913 پر رابطہ کرسکتے ہیں۔
موقع پر گفتگو کرتے ہوئے بھٹکل تعلقہ اسپتال کی میڈیکل آفسر ڈاکٹر سویتا کامتھ نے بتایا کہ بھٹکل سرکاری اسپتال میں دو ایمبولنس پہلے سے ہے، لیکن سرکاری اسپتال کی ایمبولنس کو استعمال کرنے میں چند قوانین لاگو ہیں مثال کے طور پر ایک ایمبولنس صرف حاملہ خواتین اور نو زائیدہ بچوں کے لئے مخصوص ہے، جبکہ دوسری ایمبولنس جنرل مریضوں کے لئے ہے جو خاص کر ایک اسپتال سے دوسرے اسپتال میں مریضوں کو منتقل کرنے کے کام آتی ہے۔ لیکن نعش کو لے جانے کے لئے سرکار کی طرف سے کوئی ایمبولنس نہیں ہے اورسرکاری اسپتال کی ایمبولنس پر نعش ڈالنے کی اجازت ہی نہیں ہے، ڈاکٹر سویتا کامتھ کے مطابق جب ہم سرکاری اسپتال کی ایمبولنس پر نعش ڈالنے نہیں دیتے تو عوام ہم سے جھگڑنے کے لئے آتے ہیں، جس سے ہمیں مسائل پیدا ہورہے تھے اور عوام کو سمجھانا بھی مشکل ہورہا تھا، اب ایم ایل اے نے ایمبولنس عطیہ کی ہے تو ہمیں اُمید ہے کہ عوام کو اس سے کافی فائدہ ہوگا۔
بی جےپی تعلقہ صدر سبرایا دیوڑیگا اور بی جے پی کے سابق صدر ایڈوکیٹ راجیش نائک سمیت دیگر لوگ موجود تھے۔