بھٹکل کے سبھی اسکولوں میں پروجیکٹر تقسیم؛ اقلیتی محکمہ کی جانب سے اردو اساتذہ کے لئے منعقد ہوا اسمارٹ کلاس تربیتی ورکشاپ
بھٹکل:17؍فروری(ایس اؤ نیوز)بھٹکل تعلقہ اقلیتی فلاح و بہبودی محکمہ کی جانب سے سال 2019-20کے پردھان منتری جن وکاس منصوبے کے تحت تعلقہ کے اقلیتی سرکاری اردو اسکولو ں میں تعلیمی ترقی اور طلبا کو اسمارٹ کلاس سےمتعارف کروانےکی غرض سے سبھی اسکولوں کو اسمارٹ کلاس پروجکٹر تقسیم کئے گئے ہیں، اس بات کی جانکاری محکمہ اقلیتی فلاح و بہبودی کی طرف سے جاری کردہ پریس ریلیز میں دی گئی ہے۔
پریس ریلیز کے مطابق 17فروری کومنعقدہ ایک روزہ تربیتی ورکشاپ میں اقلیتی سرکاری اردو اسکولوں کے صدورمدرس اور کمپیوٹر اساتذہ کو معلومات فراہم کئے گئے۔ تعلقہ پنچایت افسر پربھاکر چکنمنے نے تربیتی ورکشاپ کا افتتاح کیا۔ سرکاری پرائمری اسکول اساتذہ سنگھ کے صدر شنکر نائک نے پروگرام کی صدارت کی۔اقلیتی محکمہ کے تعلقہ توسیعی افسر شمس الدین نے سبھی کاا ستقبال کرتےہوئے افتتاحی کلمات پیش کئے ۔ پروگرام میں بھٹکل ہائی اسکول اساتذہ سنگھ کے نومنتخب صدر ، انجمن اینگلو اردو ہائی اسکول بھٹکل کے صدر مدرس شبیر دفعدار ، نذیر احمد ہلویگار موجود تھے۔
سرکاری ہائر پرائمری اسکول نوائط کالونی کی طالبات نے تلاوت قرآن اور نعت پیش کی۔استاد جی ٹی بھٹ نے شکریہ اداکیا۔ تعلقہ کے اردو سی آر پی ، کمٹہ تعلقہ کے اردو سی آر پی سمیت 42اساتذہ ورکشاپ میں شریک تھے۔ سی آر پی علی منیگار نے نظامت کے فرائض انجام دئیے۔