بھٹکل 10/ جون (ایس او نیوز) جنگلاتی زمین پر اتی کرم کرنے والے افراد کی قانونی رہنمائی اور ان کے حقوق کے لئے لڑنے والی ’ہوراٹا سمیتی‘ کی جانب سے اس کمیٹی کی رکنیت سازی کی مہم چلائی جارہی ہے۔
مذکورہ کمیٹی کے بھٹکل تعلقہ دفترمیں کمیٹی کے صدر رویندرا نائک نے رکنیت سازی مہم کا آغاز کرتے ہوئے بتایا کہ ہوراٹا سمیتی کی جانب سے اتی کرم داروں کو ہر طرح کی قانونی مدد فراہم کرے گی۔ زمین کی منظوری کے تعلق سے جو بھی سرکاری احکام جاری ہونگے اسے وقتاً فوقتاً اتی کرم داروں کے علم میں لایا جائے گا۔ضلع شمالی کینرا کے ہر ایک اتی کرم دار کو سماجی انصاف دلانے کی پوری کوشش کی جائے گی۔
انہوں نے بتایا کہ بھٹکل تعلقہ میں جنگلاتی حقوق قانون کے تحت 8819 درخواست د ی گئی تھیں۔ ان میں سے صرف 217درخواست گزاروں کو زمین کے حقوق والے کاغذات منظور کیے گئے ہیں اور 6961 درخواستوں کونامنظور کیاگیا ہے۔ ان عرضیوں پر نظر ثانی کے کام میں ہوراٹا سمیتی سرکاری ضلع انتظامیہ کا پورا تعاون کرنے کے لئے تیار ہے۔
ہوراٹا سمیتی کے بھٹکل تعلقہ صدر راما موگیر نے بتایا کہ اس رکنیت سازی مہم کے لئے اتی کرم داروں کو کسی قسم کی فیس ادا کرنے کی ضرورت نہیں ہے۔ یہ اتی کرم داروں کے حقوق کا تحفظ کرنے کی مہم ہے اس لئے تمام اتی کرم داروں کو منظم ہوکر کام کرنا ہوگا۔اس موقع پر رضوان، سلیمان، عبدالقیوم وغیرہ نے حاضرین سے خطاب کیا۔کمیٹی کے ضلع کنوینر دیوراج گونڈا نے استقبال کیا۔