بھٹکل: شرابی ندی کی صفائی سمیت مسلم علاقوں مٰیں بھی ندی کنارے باڑھ لگانے کا مطالبہ لے کر تنظیم وفد نے کی ڈی سی سے ملاقات
بھٹکل 8 جنوری (ایس او نیوز) بھٹکل کے قدیم محلوں سے گذرنے والی شرابی ندی گھٹر میں تبدیل ہونے، ڈرینیج سسٹم فیل ہونے، ندی کی صفائی کرنے اور ندی کے اطراف پتھروں کی دیوار قائم کرنے سمیت پرانی مچھلی مارکٹ کو ہائی ٹیک مچھلی مارکٹ میں منتقل کرنے کا مطالبہ لے کر قومی سماجی ادارہ مجلس اصلاح و تنظیم کے ایک وفد نے آج اتوار کو اُترکنڑا ڈپٹی کمشنر پربھولنگا کولیکٹّی سے ملاقات کی اور انہیں میمورنڈم پیش کیا۔
وفد کی قیادت کرتے ہوئے تنظیم صدر عنایت اللہ شاہ بندری نے ڈپٹی کمشنر کو بتایا کہ ندی میں مٹی بھرجانے سے چھ ماہ قبل اگست میں ہوئی بارش سے ندی کا پانی اُبل کر کئی محلوں میں گھس گیا تھا جس کی وجہ سے سیلابی صورتحال پیدا ہوگئی تھی، انہوں نے مطالبہ کیا کہ اس ندی کو صاف کیا جائے، اس میں گری ہوئی مٹی کو نکال کر ندی کو گہرا کیا جائے، ساتھ ساتھ ندی کے اطراف پیجنگ کرکے پانی کو باہر آنے سے روکنے کے لئے دیوار تعمیر کی جائے۔
اس موقع پرڈپٹی کمشنر کو میمورنڈم پیش کرتے ہوئے تنظیم جنرل سکریٹری عبدالرقیب ایم جے ندوی نے بتایا کہ بھٹکل رکن اسمبلی کی طرف سے صرف غیرمسلم علاقوں میں پیجنگ کرنے کا کام جاری ہے اور مسلم علاقوں کو نظراندازکرنے کی خبریں اخبارات کے ذریعے معلوم ہوئی ہے، انہوں نے کہا کہ اگر مسلم علاقوں کو نظر انداز کرتے ہوئے صرف مخصوص علاقہ میں ہی ندی کے اطراف باڑھ لگائی جاتی ہے تو ظاہر بات ہے کہ تیز بارش ہونے کی صورت میں پانی کا پورا دباؤ ندی کے اطراف اُن علاقوں میں پڑے گا جہاں یہ کام نہیں کیا گیا ہے۔ ایسے میں مسلم علاقوں میں پانی بھرجائے گا اورعلاقے ڈوب جائیں گے۔ انہوں نے اس تعلق سے ڈی سی کو بغیر کسی تفریق کے پوری ندی کے اطراف باڑھ لگانے اوراس کے لئے فنڈ مختص کرنے کی درخواست کی۔ عبدالرقیب نے ڈی سی کو اس بات کی بھی جانکاری دی کہ تنظیم کی طرف سے رکن اسمبلی سنیل نائک کو بھی میمورنڈم دیا گیا ہےاور اُن سے ملاقات بھی کی جاچکی ہے۔ مگر ندی کے اطراف باڑھ لگانے کا کام صرف غیر مسلم علاقوں میں ہی جاری ہے۔
ڈپٹی کمشنر کو ڈرینیج سسٹم کے ناقص کام کے تعلق سے بھی بتایا گیا، جبکہ میونسپل کونسل کے صدر پرویزقاسمجی نے پرانی مچھلی مارکٹ کونئی مارکٹ میں شفٹ کرنے کے تعلق سے پیش آنے والی دشواریوں کا تذکرہ کرتے ہوئے اسے جلد شفٹ کرنا ضروری قرار دیا۔
ڈی سی کو پیش کئے گئے میمورنڈم میں کہاگیا ہے کہ بھٹکل تعلقہ کے چوتھنی علاقے میں بہنے والی شرابی ندی پر محکمہ چھوٹی آب پاشی کی جانب سے کروڑوں روپئے کی لاگت سے پیچنگ کا کام جاری ہے۔ اخبارات میں شائع خبروں کے مطابق مخصوص علاقہ پر ہی پیچنگ کا کام ہورہا ہے۔ اگر ایسا ہوا تو بھٹکل شہر کےلئے کافی نقصان دہ ہوگا۔ کیونکہ صرف ایک طرف پیچنگ کی جاتی ہے تو بارش کے موسم میں پانی بھر گیا تو دوسری طرف گھس آنے کا خدشہ ہے۔ جس کے نتیجےمیں میونسپالٹی حدود کے غوثیہ اسٹریٹ اور شاذلی اسٹریٹ مکمل آب دوز ہوجائیں گی اور جائیداد وغیرہ کوشدید نقصان پہنچے گا۔
اسی طرح شرابی ندی کے چک ڈیم پر ریلنگ نصب کرنے کے لئے محکمہ چھوٹی آب پاشی نے سال 2022-2023کے منصوبے کے تحت تعمیری کام کا آرڈر جاری کیا ہے لیکن ابھی تک یہ کام شروع نہیں ہواہے۔ مجلس اصلاح وتنظیم کی جانب سے ہم ضلعی انتظامیہ سے مطالبہ کرتےہیں کہ دونوں کاموں کی طرف توجہ دی جائے اور شرابی ندی کے دونوں کناروں پر پیچنگ کی جائے اور شرابی ندی کے چک ڈیم پر ریلنگ کا کام جلد شروع کرنے کا حکم دیاجائے۔ اس موقع پرمیونسپل کونسلر محی الدین الطاف کھروری، کوسٹل کرناٹکا این آر آئی فورم کے صدرمحمد یونس قاضیا، فورم کے جنرل سکریٹری امین سیف اللہ ودیگر ذمہ داران موجود تھے۔