بابری مسجد فیصلہ؛ مجلس اصلاح وتنظیم کی طرف سے امن وامان برقرار رکھنے اور بھائی چارگی کی مثال قائم کرنےعوام الناس سے اپیل
بھٹکل:07؍نومبر(ایس اؤ نیوز) عدالت عظمی کی طرف سے ملک میں بابری مسجد کا فیصلہ بہت جلد آنے والا ہے ، اس سلسلےمیں امن وامان بحال رکھنے کو لے کر مجلس اصلاح وتنظیم بھٹکل کے صدر ایس ایم سید پرویز اور جنرل سکریٹری مولوی عبدالرقیب ایم جے ندوی نے پریس کانفرنس کے ذریعے عوام الناس سے اپیل کی ہےکہ امت کے اکابرین کی ہدایات ورہنمائی کے مطابق ہمیں عمل کرنا ہے۔
انہوں نے کہاکہ بابری مسجد کافیصلہ جو بھی آئے ہر صورت میں سپریم کورٹ کا فیصلہ تسلیم کرنا ہے۔انہوں نے آنے والے حالات سے عوام کو گھبراہٹ اور مایوسی کا شکار نہ ہونے کی بات کہی ساتھ ساتھ یہ بھی کہا کہ کسی بھی طور پر ہمیں مشتعل نہیں ہونا ہے۔ انہوں نے کہا کہ اس سے قبل بھی الہ آباد ہائی کورٹ کے فیصلے پر ملک میں امن و امان تھا انہوں نے ہندو مسلم بھائی چارگی کو فروغ دینے پر زور دیا اور کہا کہ امن و امان کو ہرحال میں برقرار رکھیں۔
گرچہ تنظیم کی طرف سے عیدمیلاد کا کوئی پروگرام نہیں ہے اس کے باوجود تنظیم کے ذمہ داران نے عیدمیلاد کے موقع پر بھی امن و امان کو باقی رکھنے کی عوام سے اپیل کی ہے۔ انہوں نے عوام الناس سے کہاکہ وہ سوشیل میڈیا، واٹس ایپ ، فیس بک وغیرہ پر غیر ذمہ دارانہ پیغامات پوسٹ کرنے اور کمنٹس کرنے سے بھی گریز کریں اور افواہوں پر کان نہ دھریں۔