بھٹکل لاک ڈاون میں کل 8 جون سے مزید ڈھیل کا اعلان؛ صبح 7سے شام7 تک کاروباری اداروں کو کھولنے کی اجازت
بھٹکل 7/جون (ایس او نیوز) بھٹکل میں کورونا کے معاملات سامنے آنے کے بعد قریب ڈھائی ماہ سے بھٹکل میں فل لاک ڈاون جاری تھا، یکم جون سے صبح آٹھ بجے سے دوپہر دو بجے تک یہاں تمام دکانوں اورکاروباری اداروں کو کھولنے کی چھوٹ دی گئی تھی، مگر اب کل 8 جون بھٹکل میں مزید چھوٹ دئے جانے کا اعلان کیا گیا ہے۔ ضلع اُترکنڑا کے ڈپٹی کمشنر ڈاکٹر ہریش کمار نے بتایا کہ کل سے صبح سات بجے سے شام سات بجے تک تمام دکانوں اور کاروباری اداروں کو کھولنے کی اجازت دی گئی ہے۔
بھٹکل اسسٹنٹ کمشنر مسٹر بھرت نے ساحل آن لائن سے فون پر گفتگو کرتے ہوئے بتایا کہ کل سے جو چھوٹ دی گئی ہے، اُس میں فی الحال ہوٹلوں میں بیٹھ کر کھانے کی اجازت نہیں ہوگی ، البتہ ہوٹلوں سے پارسل لے جانے کی اجازت رہے گی۔ انہوں نے کہا کہ بھٹکل میں حالات سازگار رہے تو اگلے چند دنوں میں مزید چھوٹ دی جائے گی۔ انہوں نے عوام الناس سے درخواست کی کہ وہ گھر سے باہر نکلتے وقت ماسک پہن کر جانا نہ بھولیں ، اسی طرح ایک دوسرے کے ساتھ فاصلہ برقرار رکھیں اور ہجوم جمع ہونےنہ دیں۔
یاد رہے کہ بھٹکل سے 43 لوگ کورونا سے متاثر ہوئے تھے جس میں سے اب تک 42 لوگ صحت یاب ہوکر اسپتال سے ڈسچارج ہوچکے ہیں۔ اب ایک خاتون کاروار کمس اسپتال میں روبہ صحت ہے۔