بھٹکل : این آر آئی فورم کی جانب سے موبائل کلینک کا افتتاح؛ شیرور کے بزنس مین نے دیا ایمبولنس کا عطیہ
بھٹکل 8 جنوری (ایس او نیوز) کوسٹل کرناٹکا این آر آئی فورم کی جانب سے آج اتوار کو موبائل کلینک کا افتتاح عمل میں آیا جس میں مہمان خصوصی کے طور پر شرکت کرتے ہوئے اُترکنڑا کے ڈپٹی کمشنر پربھولنگا کولیکٹّی نے این آر آئی فورم کی خدمات کی ستائش کی ۔انہوں نے کہا کہ جب کووڈ وباء پھیلی تو ہر کوئی مذہب ، فرقہ ، ذات ، پات ، امیری اور غریبی سب بھول کر انسانیت کی خدمت کے لئے آگے آئے تھے کہ کسی طرح دوسروں کی جانیں بچائیں۔ ہمیں آئندہ بھی اسی طرح ایک دوسرے کی مدد کرنی چاہئے ۔ ہم نے اُس دور میں بھائی چارگی کی اچھی مثال پیش کی تھی آگے بھی ایک انسان ہونے کے ناطے دوسرے انسان کی مدد کے لئے آگے آنا چاہئے۔ انہوں نے شیرور کے بزنس مین محمد میراں صاحب کی طرف سے این آر آئی فورم کو ایمبولنس عطیہ کرنے پر اُن کی ستائش کی اور کہا کہ تمام کام سرکار نہیں کرسکتی، سرکاری کاموں میں کچھ حدود ہوتے ہیں۔ مگر میراں صاحب جیسے کاروباری شخصیات آگے آئیں تو عوام کے کئی مسائل حل ہوسکتے ہیں۔
ڈپٹی کمشنر پربھولنگا کولیکٹّی نے ایمبولنس کا ربن کاٹ کر موبائل کلینک کا افتتاح کیا۔مولانا ارشاد افریقہ ندوی کے تلاوت کلام پاک سے جلسہ کا اغاز ہوا۔ این آر آئی فورم کے جنرل سکریٹری امین سیف اللہ نے فورم کا تعارف پیش کرتے ہوئے مہمانوں کا استقبال کیا۔بھٹکل کے قاضی صاحبان مولانا عبدالرب خطیب ندوی اور مولانا خواجہ معین الدین اکرمی مدنی، منکی جماعت المسلمین کے قاضی مولانا شکیل ندوی اور گرین ویلی کے سنئیر نائب صدر اور مینجنگ ٹرسٹی جناب محمد میراں نے اپنے اپنے تاثرات پیش کئے۔
بتایا گیا ہے یہ موبائل ایمبولنس قریہ قریہ جائے گی۔ لوگوں کا علاج کرنے ایمبولنس میں ایک لیب ٹیکنیشن اور ایک نرس ہمیشہ دستیاب رہیں گے۔ بتایا گیا ہے کہ عنقریب موبائل کلینک کا ٹول فری نمبر جاری کیا جائے گا، جس کے بعد عوام اس موبائل کلینک کو فون کرکے اس سے استفادہ کر سکیں گے۔
این آر آئی فورم کے صدر محمد یونس قاضیا نے صدارتی خطاب کیا۔ اس موقع پر مجلس اصلاح و تنظیم بھٹکل کے صدر عنایت اللہ شاہ بندری، بھٹکل مسلم خلیج کونسل کے صدر عمر فاروق مصباح، سکریٹری جنرل عتیق الرحمن مُنیری، بھٹکل میونسپل کونسل کے صدر پرویز قاسمجی ، بھٹکل اسسٹنٹ کمشنر ممتادیوی اور بھٹکل سرکاری اسپتال کی انچارج ڈاکٹر سویتا کامتھ ڈائس پر موجود تھے۔شیرور کے سوشل ورکر ارون کماراوربھٹکل کےاُبھرتے سوشیل ورکر مصعب عابدہ نے پروگرام کی نظامت کی۔