بھٹکل،24؍اگست (ایس او نیوز)گزشتہ سال 19اکتوبر کوبھٹکل کی شابنھاگ لاڈج میں ہوئے محمد عفان جبالی قتل کیس میں کلیدی ملزم کی حیثیت سے گرفتار محمد اقبال کو کرناٹکا ہائی  کورٹ کی دھارواڑ بینچ سے ضمانت مل گئی ہے۔

 خیال رہے کہ اس سے قبل کاروار سیشنس کورٹ نے ملزم اقبال کو قتل جیسے جرم میں ملوث ہونے اور بڑی مقدار میں رقم ضبط کیے جانے کی وجہ سے ضمانت دینے سے انکار کیا تھا۔ سیشنس کورٹ کے اس حکم کے خلاف  اقبال نے ہائی کورٹ میں اپیل کی تھی۔ ضمانت کی عرضی پر سماعت کے دوران ہائی کورٹ جج نے کہا کہ صرف علاماتی شہادت اور رقم کی ضبطی کو بنیاد بناکر ضمانت نامنظور کرنا مناسب نہیں ہے۔ اس لئے کاروارسیشنس کورٹ کے حکم کو مسترد کرتے ہوئے  ملزم اقبال کی ضمانت منظور کرتے ہوئے اسے جیل سے رہا کرنے کا حکم صادر کیا گیا۔