بھٹکل نوائط کالونی کے عوام کی ہیسکام سے شکایت؛ 15 دنوں کی زائد میٹر ریڈنگ کے ساتھ تھمایاجارہا ہے بِل
بھٹکل 19/ستمبر (ایس او نیوز) بھٹکل ہیسکام کی جانب سے ہر ماہ 4, 5 اور 6 تاریخ کو گھروں میں دیا جانے والا بِل 18, 19 اور 20 تاریخوں کو دیا جاتا ہے جس کے نتیجے میں 12 سے 15 دنوں کی میٹر Reading زائد ہوجاتی ہے اور ریڈنگ مطلوبہ یونٹ سے زائد ہونے کی صورت میں ہیسکام کی طرف سے پینالٹی بھی ڈالی جاتی ہے، اس طرح کی شکایتیں گذشتہ کئی ماہ سے الگ الگ علاقوں کے لوگوں کی طرف سے کی جارہی تھی، آج جمعرات کو نوائط کالونی بالخصوص مریم علی مسجد کے اطراف کے مکینوں نے بھی ہیسکام دفتر پہنچ کر اسی طرح کی شکایت کی ہے اور ہیسکام کے اسسٹنٹ انجینر کو بل دکھا کر بتایا ہے کہ اُنہیں 15 دنوں کی زائد میٹر ریڈنگ کے ساتھ بل تھمایا گیا ہے۔
علاقہ کے ذمہ دار جناب عنایت اللہ شاہ بندری نے بتایا کہ ہیسکام کے اہلکار اکثر لاپرواہی کا مظاہرہ کرتے ہوئے متعینہ تاریخوں کو گھر نہیں پہنچتے، البتہ بِل پر پرانی تاریخ درج رہتی ہے، اور میٹر ریڈنگ کرنے 12 اور 15 دنوں کے بعد پہنچ کر اُس وقت کی میٹر ریڈنگ درج کی جاتی ہے، ایسا کرنے سے ظاہر ہے کہ 12 سے 15 دنوں میں جتنی زائد بجلی استعمال ہوئی ہے، اُسی کے مطابق زائد میٹر ریڈنگ کا بل ہاتھوں میں تھمایا جاتا ہے۔ انہوں نے یہ بھی بتایا کہ بھٹکل کے اکثر لوگ اس طرح کی باتوں پر توجہ نہیں دیتے، مگر ایسا کرنے کی صورت میں اُن سے زائد بل لیاجاتا ہے۔ انہوں نے ہیسکام آفسر سے مطالبہ کیا کہ جس تاریخ کا بل ہے، اُسی دن کی میٹر کی ریڈنگ کرکے بل دیاجانا چاہئے اور جو بھی ہیسکام اہلکار اس طرح کی لاپرواہی کرتے ہیں اُن کے خلاف کاروائی کی جانی چاہئے۔
ہیسکام کے اسسٹنٹ انجینر مسٹر منجوناتھ نے اس تعلق سے اُن کو یقین دلایا کہ وہ اس طرح کے معاملوں کے متعلق کاروائی کریں گے اور آئندہ اس طرح کی شکایت کا موقع نہیں دیں گے۔