بھٹکل،17/اگست (ایس اونیوز) بھٹکل تعلقہ ورکنگ جرنلسٹ ایسو سی ایشن نے کمٹہ کے رکن اسمبلی دینکر شیٹی کے اس بیان کی مذمت کرتے ہوئے وزیر اعلیٰ کے نام ایک میمورنڈم دیا جس میں دینکر شیٹی نے ضلع شمالی کینرا کے صحافیوں کے تعلق سے بہت ہی ہتک آمیز باتیں کہی تھیں۔

خیال رہے کہ کمٹہ سے بی جے پی کے ایم ایل اے دینکرشیٹی نے ایک اجلاس کے دوران کہا تھا کہ یہاں کے صحافی پریس کانفرنس کی کوریج کرنے کے لئے رقم طلب کرتے ہیں اور یہ لوگ دوسرے کے پیسوں پر اپنی زندگی بسر کررہے ہیں۔

تعلقہ ورکنگ جرنلسٹ ایسوسی ایشن نے اپنے میمورنڈم میں اس بیان کا حوالہ دیتے کہا ہے کہ اس سے مذکورہ ایم ایل اے کی گھٹیا ذہنیت ظاہر ہورہی ہے۔ ان کے اس طرح کے بیان  سے گزشتہ سیکڑوں سالوں سے ضلع میں صحافتی خدمات انجام دینے والے سابقہ اور موجود ہ صحافیوں کی سخت دل آزاری ہوئی ہے۔وزیر اعلیٰ سے مطالبہ کیا گیا ہے کہ اس بیان کو سنجیدگی سے لیتے ہوئے متعلقہ ایم ایل اے کے خلاف فوری طورپر کارروائی کی جائے۔

میمورنڈم میں مزید کہا گیا ہے کہ اس طرح کے بیان سے صحافتی خدمات انجام دینے والوں کے لئے دشواریاں پیدا ہونگی اور ان کی عزت اور وقار کو ٹھیس لگے گی۔ کچھ شرپسند عناصر ایسے بیان کا فائدہ اٹھا کر صحافیوں کو نقصان پہنچانے کے بھی امکانا ت موجود ہیں۔اس کی ایک مثال بنگلورو کے حالیہ دنگے کے موقع پر دیکھنے کو ملی ہے جب صحافیوں کو نشانہ بناکر حملہ کیا گیا تھا۔ اس لئے اس قسم کے بیانا ت پر فوری روک لگادی جائے۔