بھٹکل 5/فروری (ایس او نیوز) بھٹکلی جماعت المسلمین مینگلور کی طرف سے گذشتہ روز بھٹکل تعلقہ سرکاری اسپتال کو ائیر کنڈیشن کا عطیہ دیا گیا تھا، جس پر نہایت خوشی کا اظہار کرتے ہوئے اور ذمہ داران کا شکریہ ادا کرنے کے لئے بھٹکل میں موجود جماعت کے ذمہ داران کو اسپتال کی ایڈمنسٹریٹو ڈاکٹر سویتا کامتھ نے اسپتال مدعو کیا اور جماعت کا شکریہ ادا کرتے ہوئے جماعت کی سماجی خدمات کی سراہنا کی۔
بھٹکل تعلقہ سرکاری اسپتال میں ڈاکٹر سویتا کامتھ کو چارج دینے کے بعد محترمہ اسپتال کو بہتر بنانے میں کوشاں ہیں، ہر طرح کی سہولیات فراہم کرنے اپنی جانب سے بھی کوشش کررہی ہیں اور سماجی اداروں اور سماجی کارکنوں سے بھی رابطہ کرتے ہوئے اسپتال کی بہتری کی طرف خصوصی توجہ دے رہی ہیں، بتایا گیا ہے کہ لیبر روم میں ائرکنڈیشن نہ ہونے سے حاملہ عورتوں کو سخت دشواری پیش آرہی تھی جس پر انہوں نے سماجی کارکنان کی توجہ دلائی تھی، جس کے بعد بھٹکلی جماعت المسلمین مینگلور نے ائرکنڈیشن کا عطیہ دے کر اسپتال کی اس ضرورت کو پورا کیا۔
اس موقع پر اسپتال کی طرف سے بھٹکلی جماعت المسلمین مینگلور کے نام تشکر نامہ بھی پیش کیا جس میں آئندہ بھی حسب ضرورت تعاون جاری رکھنے کی خواہش ظاہر کی گئی ہے۔
مینگلور جماعت کی طرف سے جناب سعدا حسن صاحب، اشرف سعدا اور معروف سماجی کارکن جناب نذیر قاسمجی سمیت اسپتال کے عملہ میں ڈاکٹر سویتا کامتھ، ڈاکٹر لکشمیش، ڈاکٹر سُرکشیتھ اور ڈاکٹر کملا موجود تھیں۔