بھٹکل:18؍ اکتوبر(ایس اؤ نیوز)جماعت اسلامی ہند کرناٹکا حلقہ کی طرف سے نبی ﷺ کی تعلیمات کو مسلمانوں اور برادران وطن تک پہنچانے کےلئے 17اکتوبر تا 26اکتوبر تک ریاستی سطح پر ’’سیرتﷺ مہم ‘‘ منائی جارہی ہے ۔ اسی مناسبت سے جماعت اسلامی ہند بھٹکل کی جانب سے 19اکتوبر کی صبح میں کینوپی لگاتےہوئے بزبان کنڑی کتابچوں اور پمفلٹ کی تقسیم کی گئی ۔
صبح 9بجے پرانے بس اسٹانڈ کے قریب بھٹکل میونسپالٹی کے سامنے اور بھٹکل بس اسٹانڈ کے سامنے دوجگہوں پر کینوپی لگائی گئی ۔ جہاں جماعت کے ذمہ داران نے راہ گیروں ، دکانداروں اور عوام الناس کے درمیان کنڑا زبان میں شائع ہوئے سیرتﷺ کے 600 کتابچے اور پمفلٹ تقسیم کئے گئے ساتھ میں انہیں مٹھائی بھی دی گئی ۔ اس موقع پر ہر ایک نے سیرت ﷺ کے کتابچوں کو بڑے ہی احترام سے قبول کیا۔
مہم کے متعلق جماعت اسلامی ہند بھٹکل کے قائم مقام امیر مقامی مجاہد مصطفیٰ نے بتایا کہ ریاست گیر سیرت ؐ مہم منائی جارہی ہے۔ مہم کے دوران میں سمینار، مذاکرے ، عوامی جلسے ، سیرت پروچن، معزز شخصیات سے ملاقاتیں سمیت مختلف پروگرام منعقد کرتےہوئے برادران وطن کو سیرتؐ کا پیغام پہنچانےکی کوشش کی جائے گی۔ اس موقع پر ناظم ضلع محمد طلحہ سدی باپا ، محترم قادر میراں پٹیل ، مولانا سید زبیرسمیت کئی لوگ موجود تھے۔