بھٹکل جالی پٹن پنچایت کی طرف سے ماسک نہ پہننے والوں کے خلاف کاروائی، 16 لوگوں پر جرمانہ، کورونا کرفیو کے چلتے تفریح کے لئے جالی بیچ پر جانے پر بھی پابندی
بھٹکل 23/اپریل (ایس او نیوز) بھٹکل میں کورونا کرفیو کے دوران جالی پٹن پنچایت کی طرف سے چلائی گئی مہم میں سماجی فاصلہ برقرار نہ رکھنے پر ایک گروپ پر پانچ سو روپیہ کا جرمانہ عائد کیا گیا، اسی طرح ماسک نہ پہننے پر جملہ 16 لوگوں پر جرمانہ عائد کیا گیا ہے۔ اس بات کی اطلاع جالی پٹن پنچایت کے چیف آفسر اجئے بھنڈارکر نے دی۔
ساحل آن لائن سے فون پر گفتگو کرتے ہوئے اجئے بھنڈارکر نےبتایا کہ پنچایت کی طرف سے ایک ٹیم نے کئی علاقوں کا دورہ کیا اور کئی جگہوں اور دکانوں پر سماجی فاصلہ برقرار نہ رکھنے سمیت ماسک لازمی طور پر پہننے کی تاکید کی گئی۔ انہوں نے کہا کہ کورونا پر قابو پانے کےلئے عوام کو بھی بیدار ہونا ہوگا اور انتظامیہ کا ساتھ دینا ہوگا۔ بعض جگہوں پر سماجی فاصلہ برقرار نہ رکھنے پر پہلی بار وارننگ دی گئی، جبکہ ایک گروپ پر جرمانہ بھی عائد کیا گیا۔ انہوں نے بتایا کہ جالی پٹن پنچایت حدود میں جن لوگوں نے صبح اپنی دکانیں کھول رکھی تھی، تمام دکانداروں سے بات چیت کرکے اُنہیں بند کرایا گیا ہے۔
انہوں نے بتایا کہ کورونا پر قابو پانے کےلئے آج سے ہی جالی بیچ پر تفریح کے لئے جانے پر بھی پابندی عائد کی گئی ہے، انہوں نے عوام الناس سے درخواست کی کہ وہ تفریح کی غرض سے کورونا کرفیو کے دوران جالی سمندر کی طرف بالکل رُخ نہ کریں۔ انہوں نے متنبہ کرایا ہے کہ اگر کوئی قانون کی خلاف ورزی کرتا ہوا پایا جاتا ہے تو اُن کے خلاف دفعہ 51 اور 61 قاعدہ 2015 سمیت دیگر دفعات کے تحت کاروائی کی جائے گی۔