بھٹکل،25/جون (ایس او نیوز) انڈین نوائط فورم کے زیر اہتمام بھٹکل گلمی علاقے میں واقع ابوذرؓ جمعہ مسجد اور مدرسے میں ’رین واٹر ہارویسٹنگ‘ یعنی برسات کا پانی ذخیرہ کرکے اسے بعد میں استعمال کرنے کے دومنصوبے پوری کامیابی کے ساتھ تکمیل کو پہنچے۔

یہ منصوبہ انڈین نوائط فورم کی طرف سے بھٹکل میں برسات کے پانی کو ضائع ہونے سے بچانے اور اسے عام استعمال کے قابل بنانے کے سلسلے میں بیداری لانے کی مہم کا حصہ ہے۔کیونکہ پچھلے کچھ برسوں سے بھٹکل کے بہت سے علاقوں میں ہمیشہ گرمی کے دنوں پانی کی قلت کا سامنا کرنا پڑتا ہے اور یہ ایک سنگین مسئلہ بن جاتا ہے۔

اخبارنویسوں سے گفتگو کرتے ہوئے جنرل سیکریٹری انڈین نوائط فورم معاذ جوکاکو  نے بتایا کہ  بھٹکل میں پہلے مرحلے کے طور پر کامیابی کے ساتھ مکمل کیا گیا یہ منصوبہ’رین واٹر ہارویسٹنگ پروجیکٹ‘کے کنوینر جناب بلال احمد رکن الدین، جناب ایس ایم ارشد اور جناب فیاض محتشم کی تحریک اور دلچسپی کا نتیجہ ہے۔اس سلسلے میں مزید بیداری لانے اور دوسرے علاقوں میں بھی اس طرح کے منصوبوں کو رو بہ عمل لانے کی کوشش کی جائے گی۔