بھٹکل : کیترے گرام میں پتھروں کی غیر قانونی کھدائی ۔ مقامی عوام نے دیا اے سی اور تحصیلدار کو میمورنڈم
بھٹکل ،17؍ اکتوبر (ایس او نیوز) بھٹکل اسسٹنٹ کمشنر اور تحصیلدار کو دئے گئے میمورنڈم میں کیترے گرام کے مکّی ہیتل میں پتھروں کی غیرقانونی کھدائی جاری رہنے کی شکایت کرتے ہوئے فوراً اس پر روک لگانے کی مانگ کی گئی ۔
کیترے گرام اور اطراف سے تعلق رکھنے والے عوام کی جانب سے دئے گئے میمورنڈم میں کہا گیا ہے کہ پچھلے کچھ دنوں سے اس علاقے میں لال پتھروں کی غیر قانونی کھدائی کی جارہی ہے ۔ ان پتھروں کو لے جانے والی گاڑیوں کی مسلسل آمد و رفت سے گاوں کی سڑک پوری طرح تباہ ہوگئی ہے۔ اس کے علاوہ کان کنی کرنے والی مشینوں کے شور اور اڑتی ہوئی دھول سے مقامی لوگوں کا جینا اور سانس لینا مشکل ہوگیا ہے ۔ یہاں ماحولیاتی آلوگی بھی بڑھتی جارہی ہے ۔ اس کے علاوہ دودھ اور زراعتی مقاصد سے گاوں میں پالے گئے مویشی چارہ چرنے کے لئے جاتے آتے راستے میں پتھروں کی کھدائی سے بننے والے گڈھوں میں گر کر ہلاک ہونے کی نوبت آ گئی ہے ۔
میمورنڈم میں مطالبہ کیا گیا ہے کہ ان عوامی مشکلات اور مسائل کو سامنے رکھتے ہوئے فوری طور پر اس غیر قانونی کھدائی پر روک لگاتے ہوئے عوام کو راحت دلائی جائے ۔
موصولہ رپورٹ کے مطابق اس میمورنڈم کی نقل محکمہ کان کنی و ارضیات کے ڈائریکٹر بنگلورو، ضلع ڈپٹی کمشنر شمالی کینرا ، جوائنٹ ڈائریکٹر محکمہ کان کنی و ارضیات کاروار کو روانہ کی گئی ۔