’ادارہ ادبِ اطفال‘کے مرہون منت بچوں میں کتابیں پڑھنے کا ذوق وشو ق پیدا ہورہاہے: موجودہ دورمیں عجائبات میں سےیہ بھی ایک عجوبہ ہے
بھٹکل:4؍ فروری (ایس اؤ نیوز )’ادارہ ادبِ اطفال‘ کا نام آتےہی کتب خانےمیں پرسکون بیٹھ کر اپنی من پسند کتابیں پڑھنے والے چھوٹےچھوٹےمعصوم بچوں کی تصویریں ذہن میں گردش کرنےلگتی ہیں۔ قریب 5سال کی عمر سےلےکر 15برس کی عمر تک کے لڑکوں کے لئے بچوں کے ادب کا گہوارہ بننے والا ادارہ ادب اطفال نے کئی بچوں میں کتابیں پڑھنے کا ذوق و شوق پیدا کرنے میں حددرجہ کامیاب ہے۔
عام طورپر 15سال کے بچے موجودہ دورمیں موبائیل، واٹس اپ، فیس بک کےنام پر وقت ضائع کرتےہیں۔ کئی بچے اس کی لت میں اپنی اسکول کی تعلیم بھول جاتےہیں بہت سارے بچے اسی عمر میں موبائیل کےنشے امتحانات میں ناکام ہوتے ہوئے بھی دیکھے گئے ہیں۔ گھروں میں والدین کوکسی نہ کسی طرح منوا کر خود نیاموبائیل خرید لیتےہیں اور مختلف گیمس کھیلتےہوئےاپنی زندگی برباد کرلینےوالےبچے بھی ہیں۔
معاشرے میں ایسی کئی برائیوں کو دیکھتےہوئے ادارہ ادب اطفال نے 7سال قبل اپنا ایک اشاعتی ادارہ قائم کرتےہوئے ایک چھوٹا سا کتب خانہ کی بنیاد ڈالی اور اپنے بچوں کےلئے خصوصی ماہنامہ ’’پھول ‘‘ کی شروعات کی۔ پھول نامی رسالہ میں بچوں کی پسند آنے والی کلر تصاویر اور کارٹونس وغیرہ کو شائع کرتےہوئے بچوں کو راغب کیا اور انہیں مفت میں کتابیں پڑھنے کا موقع بھی فراہم کرتےہوئے ان میں دلچسپی پیدا کی۔ ادارےکے زیر اہتمام جس وقت کتب خانےکا قیام ہوا تو پھر پلٹ کر نہیں دیکھا۔ مطالعہ کرنےوالےبچوں کی تعداد میں دن بدن اضافہ ہوتاگیا اور آج ملک بھر کے مشہور ومعروف اشاعتی اداروں کی کتابوں کےساتھ بھٹکل نوائط کالونی اور سلطان اسٹریٹ میں واقع لائبریریوں میں 3500سے بھی زائد کتابیں بچوں کو پڑھنے کے لئے دستیاب ہیں۔
بچوں کےلئے اوربچوں کے ادب کی تخلیق کامقصد لےکر مشہوراشاعتی اداروں کی کتابیں فراہم کرتےہوئے ادارہ ادب اطفال نے ایک اور مثالی کارنامہ یہ انجام دیاہے کہ بھٹکل وائی ایم ایس اے میدان میں 3فروری سے 9فروری تک بچوں کے کتاب میلہ کا انعقاد کیا ہے جس میں ملک بھر کے اشاعتی اداروں کی تصنیفات پر مشتمل بچوں کے مستقبل کو سنوارنے والی کتابوں کو پیش کیا گیا ہے۔ یہ میلہ نہ صرف بھٹکل کےلئے بلکہ پورے ضلع کےلئے ایک بہترین کام ہے۔ اردو، عربی ، انگریزی اورکنڑا زبانوں کے معروف پبلشرس بھٹکل تشریف لاچکےہیں۔ میلےمیں ہزاروں کتابوں کاخزانہ آنکھوں کو خیرہ کررہاہے۔ سینکڑوں بچوں کی موجودگی میں کتاب میلےکا شاندار اور خوب صورت افتتاح ہوچکاہے۔ بچوں کےلئےہی کتاب میلےکا اہتمام کرنا عجائبات میں سےایک عجوبہ کہیں تو غلط نہ ہوگا۔
اپنے ماہانہ رسالے ’’پھول ‘‘ کے ذریعے بچوں کو کتابوں سےجوڑنا ادارے کا فخریہ کارنامہ ہے۔ ’کہکشاں ‘ کے نام سے یوٹیوب چینل ، جدید ٹیکنالوجی سے آراستہ اسٹوڈیواسی دارے سے منسلک ہیں۔ اس کے ذریعے تربیت پانے والے بچوں نے ریاستی اور ملکی سطح کےمقابلوں میں حصہ لیتےہوئے اپنا لوہا منوارہے ہیں۔ مولانا عبدالباری ؒ ندوی اور فطرت لائبریری جیسے کتب خانوں سے بچوں میں کتابوں کے مطالعہ کا شوق،و دلچسپی پیداکرنے کے علاوہ ادارہ کی کوششیں بچوں کو کتابوں کی طرف راغب کرنےمیں کامیاب ہے۔
بھٹکل کے عوام اس بات پر مسرت کا اظہار کررہے ہیں کہ ’پھول ‘ کے مدیراعلیٰ مولانا سمعان خلیفہ ندوی ،مدیر مولانا عبداللہ غازیؔ ندوی ، ادارہ ادبِ اطفال کے صدر مولاناعبدالحمید اطہر ندوی ،جنرل سکریٹری مولانا معظم شاہ بندری ندوی ، نائب صدر مولانا سعود شینگٹی ندوی اور ان کے رفقائے کار کی جانفشانی سے آج بچوں میں کتابیں پڑھنے کا شوق پیدا ہورہاہے اور ادبی میدان میں انہیں آگے بڑھنے کا موقع فراہم ہواہے۔
