بھٹکل : کرائے کے مکان کے ڈپازٹ کی رقم مانگنے پر ڈاکٹر پر حملہ
بھٹکل:5؍ دسمبر(ایس اؤ نیوز) کرائے کا مکان خالی کرنے کے بعد ڈپازٹ کی رقم طلب کرنے پر پرائیویٹ اسپتال کے ایک ڈاکٹر پر چار لوگوں نے گالی گلوچ کرتےہوئےحملہ کیا اور ڈپازٹ کی رقم واپس کرنے سے انکار کردیا۔ یہ واردات بھٹکل میں دو روز قبل پیش آئی ہے۔
بھٹکل ٹاون پولس تھانہ میں درج شکایت کے مطابق ڈاکٹر شئیلیش نے تعلقہ کے منکولی میں واقع راج کلینک کے قریب ایک مکان کو کرائے پر لیا تھا۔ جب انہوں نے مکان خالی کرنے کے دوران اپنی ڈپازٹ رکھی ہوئی رقم واپس مانگی تو مکان مالک نے رقم واپس کرنے سے انکار کردیا اور اُسی بات پر چار لوگوں نے ان پر حملہ کردیا۔ اس تعلق سے ڈاکٹر شیلیش نے گاندھی ہاؤس کے مکین دیپک شٹی، ونایک گاندھی، سیتلا گاندھی اور روپا گاندھی کے خلاف معاملہ درج کیا ہے۔ حملہ کا شکار ڈاکٹر شئیلیش ، منی پال اسپتال میں زیر علاج ہیں۔ بھٹکل ٹاون پولس معاملے کی چھان بین کررہی ہے۔