بھٹکل میں تھم گیا بارش کا سلسلہ؛ دو دن میں ہوئی بارش کے دوران درخت اور بجلی کے کھمبے بھی زمین بوس
بھٹکل :21؍مئی (ایس اؤ نیوز) بھٹکل تعلقہ میں گذشتہ دو روز سے برستی موسلادھار بارش جمعہ کو تھمتی نظر آئی، اس کے ساتھ ہی آج سنیچر کو بھی بارش نہ ہونے سے پھر ایک بار گرمی شروع ہونے کے آثار نظر آنے لگے۔ صبح سے آسمان ابر آلود رہا مگر بارش نہ کے برابرر ہی۔ محکمہ موسمیات کی رپورٹ کے مطابق آج سنیچر کو بارش کی پیمائش 4.8 ایم ایم ریکارڈ کی گئی حالانکہ جمعرات سے جمعہ صبح آٹھ بجے تک 187.2 ملی میٹر بارش ریکارڈ کی گئی تھی۔
اس سے قبل دو دنوں تک ہوئی موسلادھار بارش کی وجہ سے ماروکیری کوٹ کھنڈ میں ایک گھر منہدم ہونے کا واقعہ پیش آیا تھا اس کے ساتھ ساتھ
بارش کی وجہ سے کئی درخت اور بجلی کے کھمبے بھی زمین بوس ہوگئے، اُسی طرح کئی علاقوں میں سڑکیں بھی پانی کے ساتھ بہہ گئیں۔ جبکہ جالی روڈ اور حنیف آباد میں انڈر گراونڈ ڈرینیج کے کام کی وجہ سے مٹی بھری ہوئی جگہوں پر مٹی کھسک جانے سے پوری سڑک کا حال بے حال نظر آیا۔ مخدوم کالونی اور اسارکیری کو جوڑنے والی سڑک پر درخت گرنے سے تھوڑی دیر کے لئے سواریوں کی آمد ورفت بند ہوگئی۔ موڈشرالی، مرڈیشور سمیت تعلقہ کے مختلف مقامات پر 4بجلی کے کھمبے ٹکڑے ہوکر گرپڑے ، اسی طرح 2 ٹرانسفرمرس خراب ہوگئےہں جس کی درستگی کا کام ہورہا ہے۔
محکمہ موسمیات کے مطابق ابھی تک کی کل بارش کی پیمائش 365.60 ایم ایم بارش ریکارڈ کی گئی ہے۔ سنیچرکو ویسے تو بارش کا سلسلہ رکا ہوا تھا، مگر تعلقہ بھر میں سیاہ بادل چھائے ہوئے تھے۔ محکمہ موسمیات کی مانیں تو یہاں مزید بارش ہونے کے امکانات ہیں۔