ہوناور تعلقہ کے گونڈبال علاقے میں سیلاب سے باغات اور مکانات زیر آب۔ رکن اسمبلی سنیل نائک، اسسٹنٹ کمشنر اور تحصیلدارنے کیا علاقے کا دورہ
ہوناور 8/اگست (ایس او نیوز) سداپور تعلقہ میں کل ہوئی تیز بارش کے بعد ندیوں میں سیلاب آگیا جس کی وجہ سے ہوناور کا گوڈبال علاقہ بری طرح متاثر ہوا ہے۔
موصولہ رپورٹ کے مطابق گونڈبال میں ندی کے دونوں کناروں پر گھروں میں آدھی رات کو پانی گھس آیا۔ مکانات کے علاوہ کھیت اور باغات بھی پانی میں ڈوب گئے ۔حالانکہ ہوناور میں صرف 152ملی میٹر بارش ہوئی لیکن سداپور تعلقہ اور گھاٹ کے علاقے میں برسنے والی بارش کی وجہ سے ہوناور تعلقہ میں سیلاب آگیا۔رات کے اندھیرے میں اچانک گھروں میں پانی گھسنے کی وجہ سے لوگوں میں دہشت پھیل گئی۔
گونڈبال اور اس کے اطراف والے علاقوں میں سیلاب کی خبر ملنے پربھٹکل ایم ایل اے سنیل نائک، اسسٹنٹ کمشنر ساجد ملا، ڈپٹی تحصیلدار ستیش گوڈا وغیر ہ نے متاثرہ علاقے کا دورہ کرتے ہوئے عوام کو راحت پہنچانے کے انتظامات شروع کیے۔زیر آب آنے والے علاقوں کے 53خاندان کے افراد کے لئے 5 اسکولوں میں راحت کیمپ(گنجی کیندرا) میں منتقل کیا گیا ہے۔تیز برسات اور طوفانی ہواؤں کی وجہ سے درختوں کے علاوہ بجلی کے کھمبے بھی زمین سے اکھڑ گئے جس کے نتیجے میں علاقے میں بجلی منقطع ہوگئی ہے۔
ایم ایل اے سنیل نائک نے بتایا کہ اسمبلی حلقے میں مسلسل بارش سے ہونے والی ممکنہ دشواریوں پر نظر رکھنے کے لئے نوڈل آفیسروں کو تعینات کیا گیا ہے۔اور کسی بھی علاقے میں سیلابی صورتحال پید ا ہوتے ہی امداد اور راحت کاری کے اقدامات کرنے کے لئے سرکاری افسروں کو واضح ہدایات دی گئی ہیں۔انہوں نے کہا کہ کسی بھی قسم کی مشکل پیش آنے کی صورت میں عوام کو چاہیے کہ متعلقہ افسران سے رابطہ کریں یا پھر براہ راست ان کے اپنے دفتر سے رابطہ کرتے ہوئے تفصیلات بتائیں۔
