بھٹکل :27؍اپریل(ایس اؤ نیوز) بھٹکل کے ہریجن کالونی میں میونسپالٹی مزدوروں کے خاندان والوں کے لئے کووِڈ ٹیسٹ کیمپ کا انعقاد کیا گیا جس میں تمام لوگوں کے سیمپل لئے گئے اور جانچ کے لئے روانہ کئے گئے۔ اس موقع پر خطاب کرتے ہوئے بھٹکل اسسٹنٹ کمشنر ممتا دیوں نے تمام لوگوں سے وبائی مرض کووڈ سے نجات حاصل کرنےکےلئے پیشگی احتیاطی تدابیر اختیار کرتےہوئے کووڈ انجکشن لگوانے کی اپیل کی اور کہا کہ تمام لوگوں کو لازمی طورپر کووڈ اصولوں کی پابندی کرنی چاہئے اور لاک ڈاؤن کے لئے آپ سب کا تعاون ضروری ہے۔
جالی پٹن پنچایت کے چیف آفیسر اجئے بھنڈارکر نے خطاب کرتے ہوئےکہاکہ میونسپالٹی کے مزدور کورونا وبا ء کو روکنے کےلئے پہلی صف میں کھڑے ہوکر کام کرتے ہیں، اس سلسلے میں ان کا کردار کافی اہم ہے۔ ان حالات میں اپنے ساتھ اپنے خاندان والوں کی صحت کی حفاظت کرنا بھی اہم اور ضروری ہوجاتاہے۔ اگر کسی میں کورونا کی علامتیں ظاہر ہوتی ہیں تو غفلت نہ برتیں بلکہ فوری علاج کروانے کی اپیل کی۔ میونسپالٹی کی صحت عامہ افسر سوجیا سومن موجود تھیں۔