بھٹکل 08/ مئی (ایس او نیوز) بھٹکل تعلقہ ہیبلے گرام پنچایت کے حنیف آباد میں جنگلاتی زمین پر پنچایت کی طرف سے کچرا ٹھکانے لگانے کی کوشش پر مقامی لوگوں نے سخت مخالفت کی جس کے بعد پنچایت کے اراکین نے اس سلسلے میں کیا جارہا کام روک دیا۔

    پنچایت والوں نے اس علاقے میں ادھر اُدھر پڑے ہوئے کچرے کے ڈھیر کو حنیف آباد کے نیرلیسر میں واقع جنگلاتی زمین پر بڑا گڈھا کھود کر ٹھکانے لگانے کا منصوبہ بنایا تھا۔ گڈھا کھودنے سے قبل متعلقہ مقام پر جانے کے لئے عارضی راستہ بنانے کے لئے جب جے سی بی مشینوں کے ساتھ پنچایت انتظامیہ کے افراد پہنچے تو مقامی لوگوں نے ان کا گھیراو کرتے ہوئے کہا کہ اس طرح رہائشی علاقے میں کچرا ٹھکانے لگانے سے عوامی صحت کو خطرات لاحق ہونے کے علاوہ بد بو اور آوارہ کتوں کی وجہ سے لوگوں کا جینا حرام ہوجائے گا۔ برسات کے موسم میں اس علاقے سے پانی نشیب میں بہتا ہے۔ اس لئے اگر یہاں کچرے کا ڈھیر لگادیا گیا تو پھر پانی بہنے کا راستہ بند ہوجائے گا جس سے یہاں کے لوگوں کے لئے مسائل پیدا ہونگے۔ اس لئے کسی قیمت پر یہاں پر کچرا ٹھکانے کی اجازت نہیں دی جائے گی۔

    ادھر پنچایت کے کچھ اراکین اور عملہ نے یہ موقف ظاہر کیا کہ کچرا ٹھکانے کے لگانے کے لئے ایک ذخیرہ مرکز بنانے کا منصوبہ ہوا ہے۔ مگر اس وقت چونکہ عید کے دن قریب آ گئے ہیں اور گھروں کے آس پاس کچرے کے ڈھیر لگ گئے ہیں اس لئے پنچایت نے یہ فیصلہ کیا تھا کہ صرف ایک مرتبہ تمام کچرا جنگلاتی زمین پر گڈھا کھود کر دفن کیا جائے ۔ اس کے بعد جو نیا مرکز قائم ہوگا وہاں پر کچرا ٹھکانے لگایا جائےگا۔ مگر یہاں کے لوگ یہ بات سمجھ نہیں پارہے ہیں۔ 

    جب تکرار بڑھ گئی اور ماحول گرم ہوگیا تو پنچایت کے اراکین اور عملہ راستہ تعمیر کرنے کا کام ادھورا چھوڑ کر وہاں سے نکل گئے۔ 

    اس موقع پر پنچایت رکن اور بی جے پی بھٹکل یونٹ کے صدر سبرایا دیواڈیگا، چندرو گونڈا، وجیت شیٹی کے علاوہ مقامی باشندے مشتاق، صادق، واثق، سہیل، جمان اور پنچایت اسٹاف ونائیک اور دیگر افراد موجود تھے۔