بھٹکل،26؍ستمبر (ایس او نیوز) بھٹکل تعلقہ میں بسنے والے ’گونڈا قبیلے ‘ سے متعلقہ افراد کو ’درج فہرست قبیلہ‘ کی سرٹفکیٹ جاری کرنے میں رکاوٹ اور ’گرام وکلیگا‘ طبقے سے تعلق رکھنے والے افرادغیر مجاز طریقے سے اس قسم کے سرٹفکیٹ حاصل کرنے کا تنازعہ حل کرنے کے لئے اسسٹنٹ کمشنر کے دفتر میں ایک میٹنگ منعقد کی گئی جس میں درج فہرست طبقات کے نمائندے اور محکمہ جاتی افسران شریک ہوئے۔
میٹنگ کے دوران گونڈا سماج کی نمائندگی کررہی منگلا گونڈا نے الزام لگایا کہ ہمیں ذات سرٹفکیٹ اور آر ڈی نمبر نہیں دیا جارہا ہے۔ اس سلسلے میں ہمارے ساتھ انصاف کیا جانا چاہیے، کیونکہ ہم ہی بنیادی طور پر ’درج فہرست قبائل‘ میں شامل ہیں۔دلت نمائندے نارائن شیرور نے الزام لگاتے ہوئے کہا کہ بھٹکل تعلقہ میں ’گرام وکلیگا‘ طبقے کے افراد اپنے اسکول داخلے اور دیگر کاغذات میں ترمیم کرکے اپنے آپ کو ’درج فہرست قبائل‘ میں شامل بتاتے ہوئے ’ذات سرٹفکیٹ ‘ حاصل کرتے ہیں۔اس کی وجہ سے گونڈا طبقات کے ساتھ ناانصافی ہوتی ہے۔
اس میٹنگ میں موجود سماج کلیان محکمہ کی ڈپٹی ڈائریکٹر گیتا ہیگڈے نے اس بات کی توثیق کی کہ بھٹکل تعلقہ میں بہت سے لوگ اسکول کے اندراجات میں موجود ’گرام وکلیگا‘ میں ترمیم کرواتے ہیں۔ حالانکہ اس طرح ترمیم کرنے کے اختیارات اسکول ہیڈماسٹر کو نہیں ہوتے لیکن ایسا ہورہا ہے۔تحصیلدار روی چندرا نے اس تعلق سے تحقیقات کرکے مناسب اقدامات کرنے کا یقین دلایا۔
اس کے علاوہ کونار گرام کے نامدھاری سماج کے یووا لیڈر گنپتی نائک، منجو ناتھ نائک وغیرہ نے ایک میمورنڈم اسسٹنٹ کمشنر کو دیتے ہوئے مطالبہ کیا کہ ’گرام وکلیگا‘ طبقے سے تعلق رکھنے والے بعض افراد جھوٹے دستاویزات تیار کرکے اپنے آپ کو ’درج فہرست گونڈا‘ قبیلے سے ثابت کرتے ہیں اور ’ذات سرٹفکیٹ‘ کے ذریعے سرکار ی سہولتیں حاصل کرتے ہیں۔ اس لئے ایسے لوگوں کے خلاف سخت کارروائی کی جائے۔