بھٹکل کی سماح برماور نے ایم بی بی ایس (اول) میں مینگلور کالج میں کیا ٹاپ ؛ یونیورسٹی سطح پر ملا چوتھا رینک
بھٹکل:19؍فروری(ایس اؤ نیوز) راجیوگاندھی میڈیکل یونیورسٹی کی طرف سے جاری کردہ رواں سال کے ایم بی بی ایس کے نتائج ظاہر ہونے کے بعد بھٹکل کی سماح بنت ناصر برماور نے ایم بی بی ایس سال اول میں شاندار پرفارمینس پیش کرتے ہوئے اپنی کالج میں اول رینک اور پوری یونیورسٹی میں چوتھا رینک حاصل کرنے میں کامیاب ہوگئی ہیں۔ انہوں نے منگلورو کی شری نواس انسٹی ٹیوٹ آف میڈیکل سائنس اینڈ ریسرچ سنٹر سے تعلیم حاصل کی تھی۔
ذرائع سے ملی اطلاع کے مطابق بھٹکل کی سماح بنت ناصر برماور نے ایم بی بی ایس سال اول میں پوری یونیورسٹی میں چوتھا رینک حاصل کیا ہے ، اگر شعبہ جات کا جائزہ لیں تو انہوں نے اناٹومی میں یونیورسٹی سطح پر 9واں رینک ،بائیو کیمسٹری میں چوتھا رینک اور ای این ٹی میں 8واں رینک حاصل کرتےہوئے پورے بھٹکل کا نام روشن کردیا ہے۔
سماح نے بھٹکل انجمن گرلز ہائی اسکول سے ایس ایس ایل سی مکمل کرتے ہوئے 96 فیصد مارکس کے ساتھ شاندار کامیابی درج کی تھی، جبکہ انہوں نے انجمن پرے یونیورسٹی کالج فور ویمن (شعبہ سائنس) میں اپنا پی یوسی مکمل کرتے ہوئے 96.33 فیصد مارکس کے ساتھ زبردست کامیابی حاصل کی تھی، یاد رہے کہ پی یو سی دوم میں سماح نے حساب اور کیمسٹری میں سو میں سو مارکس حاصل کئے تھے۔سماح کے والد جناب ناصر برماور نے بتایا کہ ان کی دُختر ایم بی بی ایس مکمل کرنے کے بعد اب بنگلور کے بورنگ اسپتال میں انٹرشپ کررہی ہیں۔
سماح کی بہترین کامیابی پر بھٹکل کے مختلف اداروں کی جانب سے مبارکبادی کے پیغامات جاری ہیں، قائد قوم جناب ایس ایم سید خلیل الرحمن، انجمن حامئی مسلمین بھٹکل کے صدر جناب عبدالرحیم جوکاکو ، جنرل سکریٹری صدیق اسماعیل ،قومی سماجی ادارہ مجلس اصلاح و تنظیم بھٹکل کے صدر جناب ایس ایم سید پرویز اور جنرل سکریٹری مولوی عبدالرقیب ایم جے ندوی سمیت اداروں کے دیگر اراکین کی جانب سے مبارکباد پیش کی گئی ہے۔ ادارہ ساحل آن لائن کی جانب سے بھی انہیں اور ان کے والدین کو مبارکباد پیش کی گئی ہے۔