بھٹکل:جنگلاتی زمین کے قبضہ داروں کو حقوق دلانے میں قانون ناکام ہوگیا ہے۔اتی کرم داروں کی بلاوجہ ہراسانی بند کی جائے۔ رویندرا نائک کا مطالبہ
بھٹکل 28/دسمبر(ایس او نیوز) جنگلاتی زمین پر قبضہ داروں کے حقوق کے لئے جدوجہد کرنے والی کمیٹی صدر رویندرا نائک نے مطالبہ کیا ہے کہ ضلع شمالی کینرا میں اتی کرم داروں کو محکمہ جنگلات کے افسران بلاوجہ اور مسلسل ہراساں کررہے ہیں۔ اس لئے سنیچر کے دن وزیر اعلیٰ ایڈی یورپا کی ہوناور آمد کے موقع پر ضلع کے اراکین اسمبلی یہ مسئلہ ان کے علم میں لائیں اور ہراسانی کا سلسلہ بند کروائیں۔
انہوں نے کہا کہ جنگلاتی حقوق قانون کے تحت درخواستیں دینے کے باوجود بعض علاقوں میں محکمہ جنگلات کے افسران لوگوں کو پریشان کررہے ہیں۔ کمزور گھروں کی مرمت کرنے کی بھی اجازت نہیں دے رہے ہیں۔جو پرانے مکانات گر گئے ہیں انہیں دوبارہ تعمیر کرنے کا موقع بھی نہیں دیا جارہا ہے۔حالانکہ وزیراعلیٰ نے اسمبلی اجلاس کے دوران واضح کیا تھا کہ جنگلاتی زمین پر قبضہ داروں کو کسی طرح بھی پریشان نہ کیا جائے۔ جو مکانات گر گئے ہیں انہیں دوبارہ تعمیر کرنے کا موقع دیا جائے۔ اور قبضہ داروں کے مسائل کو انسانیت کی بنیاد پر حل کیا جائے۔ لیکن اس کے باوجود ضلع شمالی کینرا میں محکمہ جنگلات کے افسران کی طرف سے بعض مقامات پر ہراسانی برابر جاری ہے۔اس لئے حکومت کوچاہیے جلد سے جلد قانونی طور پر قبضہ داروں کو راحت پہنچائی جائے اور ان کی درخواستوں کو منظوری دیتے ہوئے ان کے حقوق انہیں فراہم کیے جائیں۔رویندارا نائک نے کہا کہ ضلع شمالی کینرا میں 85,557 قبضہ داروں نے اپنی زمین کی منظوری کے لئے درخواستیں دی تھیں ان میں سے 74,220 درخواستیں (%74.34) نامنظور کی گئی ہیں۔اس لئے ضلع کے اراکین اسمبلی کو اس طرف توجہ دینی چاہیے اور حکومت کو اپنی پالیسی قبضہ داروں کے مفاد میں ترتیب دے کر اسے واضح کردینا چاہیے۔