بھٹکل:18؍جنوری (ایس اؤ نیوز) دو برس پہلے تعلقہ بھر میں مبینہ طور پر  عوام کو ڈبل رقم اداکرنے کا جھانسہ دینے والے  ’فلا لیس ‘‘دھوکہ دہی معاملےمیں بھٹکل پولس نے ایک اور ملزم کو ممبئی میں گرفتار کرلیا ہے۔

گرفتار شدہ ملزم کی شناخت موسیٰ نگر کے مکین محمد غفران کی حیثیت سے کی گئی ہے۔ پولس ذرائع سے ملی اطلاع کے مطابق ملزم دو سال سے فرار تھا اور بیرونی ملک جانےکےلئے ہوائی اڈے کی طرف روانہ ہوا تھا جس کی مصدقہ خبر پر کارروائی کرتےہوئےپولس نے اُسے گرفتارکرلیا۔ ذرائع نے بتایا کہ غفران کو عدالت میں پیش کرنے کے بعد ایک ہفتے کی پولس کسٹڈی حاصل کی گئی ہے اور پولس اس سے مزید پوچھ تاچھ کرنے میں لگی ہوئی ہے۔

یاد رہے کہ اس سے قبل اسی معاملے میں پولس نے واثیق نامی فرد کو گرفتار کیا تھا جو بعد میں ضمانت پر رہا ہوگیا تھا۔ ان دونوں پر عوام کو زیادہ منافع کا جھانسہ دے کر فلا لیس کمپنی کےنام پر کروڑوں روپیہ لوٹنے اور انہیں واپس نہ کرتے ہوئے دھوکہ دینے کا الزامہے۔ خیال رہے کہ  عوام کو جب اپنا پیسہ واپس نہیں ملا تو مشتعل ہوکر عوام نے ملزمان کے گھروں کا گھیراؤ کرتے ہوئے احتجاج بھی کیاتھا۔  اس تعلق سے پولس مزید چھان بین کررہی ہے۔