بھٹکل کے ماوین کوروے بندرگاہ سمیت ریاست کے 8ماہی گیربندرگاہوں کی صفائی کےلئے ریاستی حکومت کی جانب سے 200کروڑروپیوں کی توثیق: ابتدائی کاموں کےلئے 20کروڑروپئے منظور
کاروار :21؍مئی (ایس اؤ نیوز)اترکنڑا ضلع کے 5ماہی گیر بندرگاہ سمیت ریاست کے کل 8ماہی گیر بندرگاہوں کی صفائی کے لئے ریاستی حکومت نے 200کروڑ روپئے امداد کا اعلان کیا ہے جس میں سے 20کروڑروپئے ابتدائی کام کے لئے منظور کئے گئے ہیں۔
اترکنڑا ضلع کے بھٹکل کے ماوین کوروے ، ہوناور کے کاسرکوڈ، تڈدی، آمدلی اور کاروار ماہی گیربندرگاہوں کی صفائی کی جائے گی۔ اس کے ساتھ ساتھ منگلورو، اُڈپی اور گنگولی کے ماہی گیر بندرگاہوں کےکیچڑوغیرہ کو صاف کرنے کا منصوبہ تشکیل دیاگیاہے۔ فی بندرگاہ کی صفائی کےلئے 25کروڑ روپئے کےمطابق کل 200کروڑروپیوں کو انتظامی منظوری مل چکی ہے۔ ریاستی حکومت ابتدائی کاموں کے لئے فی بندرگاہ 2.5کروڑروپئے منظور کئے ہیں۔محکمہ کی جانب سے ٹینڈر سمیت دیگر ضروری کاموں کی شروعات ہو چکی ہے۔ ریاست کے 8بندرگاہوں کا پہلے مرحلے میں باتھی میاٹرک سروے سمیت ڈریجنگ کی جائے گی۔ جس کے لئے بھی ابتدائی رقم منظور کی گئی ہے۔
متعلقہ بندرگاہوں پر کیچڑ اور کچرا جمع ہونے کی وجہ سے ماہی گیر کشتیوں کو لنگرانداز کرنے اور بوٹوں کوباہر نکالنے میں دشواری محسوس کررہے ہیں ے۔ بندرگاہ پر کیچڑجمع ہونے کی وجہ سے بعض دفعہ ایک کشتی سے دوسری کشتی میں جانے کے دوران ماہی گیر توازن کھو کر نیچے گرنے کی صورت میں وہ کیچڑمیں پھنس کر اپنی جان گنوانے کاخطرہ بھی بنا رہتاہے۔ پانی کی سطح کم ہوگئی تو ماہی گیر کشتیوں کے نیچے کا حصہ کیچڑکی وجہ سے خراب ہونے کا خدشہ رہتاہے۔ اور بعض مرتبہ کشتیوں کو مچھلی شکار کےلئے نکالنا بھی مشکل ہوجاتاہے۔ انہی وجوہات کی بناپر ماہی گیر بندرگاہوں کی صفائی کا منصوبہ تشکیل دیاگیا ہے۔ خیال رہے کہ چند دن قبل بھٹکل کے ماوین کوروے بندرگاہ پر تین ماہی گیر کشتیاں کیچڑ میں پھنس کر پلٹ جانے سے قریب 15لاکھ روپیوں کانقصان ہواتھا۔