بھٹکل:09؍اکتوبر(ایس اؤ نیوز) تعلقہ بھر میں جنگلی سوروں کے قہر سے کسان حیران پریشان ہیں، کھیتوں میں کسانوں کی محنت سے سرسبز و شاداب زمینات پر کھڑی دھان کی فصل کو جنگلی سوروں نے برباد کرنے سے کسان آسمان کی طرف نظر اُٹھائے ہوئے ہیں۔
جالی پنچایت حدود کے ہرلی علاقے میں گزشتہ دو مہینوں سے جنگلی سور گروپ کی شکل میں کھیتوں میں گھس کر بربادی مچاتے رہے ہیں، کھیتوں کے اطراف لگائی گئی باڑ وغیرہ نکل گئی ہے، سورکی بھاگ دوڑ سے فصلیں کیچڑ میں تبدیل ہوگئی ہیں جس کے نتیجے میں دھان کی فصل جانے دیجیے جانوروں کے لئے چارہ کاٹنا بھی محال ہوگیا ہے۔ جنگلی سوروں کو ڈرانے کے لئے کسانوں نے اپنے کھیتوں میں نصب کئے صدائی آلات کی آواز سے سور ڈرتے ہی نہیں، بھاگ جاتے ہی نہیں تو کسان دوسری کوئی تدبیر نہ سوجھنے سے سرپکڑ کر بیٹھ گئے ہیں۔ کسانوں سے جنگلی سوروں کو بھگانے کے لئے فاریسٹ افسران کو کئی مرتبہ درخواست دینے کے باوجود کوئی فائدہ نہیں ہورہاہے۔ تعلقہ انتظامیہ کم سے کم اب تو ان کی مدد کے لئے غورکرنالازمی ہوجاتاہے۔ اسی طرح کسانوں نےمطالبہ کیا ہےکہ عوامی نمائندے اور افسران اس طرف توجہ دے کر کوئی تدبیر ڈھونڈیں اور کسانوں سے زیادہ حالیہ برسوں میں کم ہوتی زرعی زمین کے تحفظ کو لےکر کوئی انتظام کریں۔