بھٹکل کے کئی ایک اداروں سے منسلک اور ساحل آن لائن کے پہلے نائب چیرمین سعید دامودی دبئی میں چل بسے
دبئی 3/ جنوری (ایس او نیوز) بھٹکل کے کئی ایک اداروں سے منسلک اور ساحل میڈیا اینڈپبلیشنگ سوسائٹی کے پہلے نائب چیرمین جناب سعید حُسین دامودی (89) اتوار دوپہر دبئی میں انتقال کرگئے۔ انا للہ و انا الیہ راجعون۔
موصوف کچھ دنوں سے بے حد کمزوری محسوس کررہے تھے ، جب طبیعت زیادہ بگڑی تو جانچ کےلئے اپنی اہلیہ اور بیٹے کے ساتھ قریبی اسپتال کےلئے کار پر سوار ہوئے، مگر اسپتال پہنچنے سے پہلے ہی موت کا فرشتہ آپہنچا اور پل بھر میں اپنے خالق حقیقی کے بلاوے پر لبیک کہہ گئے۔ مرحوم کے چار بیٹے اور چھ بیٹیوں میں ایک بیٹا بچپن میں ہی انتقال کرچکا ہے ۔
راشد اسپتال سے کاغذی کاروائیوں کے بعد میت پیر صبح نو تا دس بجے تک لواحقین کے حوالے کرنے کی توقع ہے اور میت ملتے ہی پیر صبح کو ہی دبئی کے قبرستان میں تدفین عمل میں آئے گی۔
مرحوم کے فرزند عبدالخالق دامودی کے مطابق ان کے والد سعید دامودی صاحب ہندوستان کے مشہور محقق اور مفسر قرآن مولانا عبدالماجد دریابادی سے بے حد متاثر تھے، یہی وجہ ہے کہ انہوں نے قریب 1962 میں ماجیدی اسٹورس کے نام سے پہلے پہل اپنا کاروبار شروع کیا تھا۔ گلف کی سرزمین پر پہلے پہل قدم رکھنے والوں میں شامل مرحوم سعید صاحب نے بعد میں النوائط ٹریڈرس کے نام سے تجارت شروع کی تھی جو بے حد کامیاب رہی۔
دبئی میں قریب 1972 میں جب نوائط اسوسی ایشن کا قیام عمل میں آیا تو اُس وقت موصوف بھی نہایت نہایت پیش پیش تھے، 
بعد میں 1977 میں بھٹکل مسلم جماعت دبئی کا باقاعدہ قیام عمل میں آیا تھا۔ بتایا جاتا ہے کہ جناب سعید حُسین دامودی نے مرحوم صدیق جعفری صاحب اور دیگر رفقاء کے تعاون سے دبئی جماعت کی بنیاد ڈالی تھی اور ایک عرصہ تک آپ صدارت کے عہدہ پر فائز رہے تھے۔ چونکہ دبئی کے تاجروں سے آپ کے کافی اچھے روابط تھے، یہی وجہ ہے کہ موصوف نے اپنے توسط سے قوم کے بے شمار افراد کی تلاش معاش میں مدد کی اور کئی افراد کو کاروبار کی نئی راہیں بھی دکھائیں۔ان روابط کی وجہ سے آپ نے ملک و وطن کے قومی و ملی اداروں کے لئے مالیات کی فراہمی میں بھی بڑا اہم رول ادا کیا، آپ انجمن حامئی مسلمین بھٹکل کے ساتھ ساتھ دبئی جماعت کے بھی سرپرست تھے,، آپ بھٹکل کے عظیم دینی درسگاہ جامعہ اسلامیہ کے رکن شوریٰ بھی تھے جبکہ آپ جامعات الصالحات اور علی میاں اسلامک اکیڈمی کے ٹرسٹیان میں سے تھے۔
سن 2006 میں جب پہلی مرتبہ ساحل آن لائن کی کمیٹی ترتیب دی گئی تھی تو آپ اس کمیٹی کے نائب چیرمین منتخب ہوئے تھے، آپ چاہتے تھے کہ بھٹکل کے نوجوان بھی میڈیا کے میدان میں آگے آئیں اور قوم وملت کی باگ دوڑ سنبھالیں، آخری وقت تک ساحل آن لائن سے لگاو رہا ،جب بھی بھٹکل تشریف آوری ہوتی، ساحل آن لائن دفتر پہنچ کر بھٹکل سمیت ملک بھر کے حالات سے واقفیت حاصل کرتے تھے اور نوجوانوں کو قوم و ملت کی بہتری کے لئے کام کرنے کی تلقین کرتے تھے۔
بھٹکل خلیفہ محلہ کے ایک معزز گھرانے میں انکھیں کھولنے والے جناب سعید دامودی نے ابتدائی تعلیم سرکاری اسکول سے حاصل کی تھی، پھر انجمن اسکول سے پانچویں اورممبئی کے ہائی اسکول سے میٹرک کا امتحان پاس کیا۔ بعد میں ممبئی کے ہی ایک کالج سے شعبہ کامرس میں ڈپلوما مکمل کیا، تعلیم کے ساتھ ساتھ اپنے سرپرست ڈی اے اسماعیل کے کاروبار سے آپ منسلک ہوئے اور تجارت کا بھرپور تجربہ حاصل کرتےہوئے ممبئی سے ہی گلف کے تاجروں سے اچھے روابط قائم کئے ۔ چند سال بعد ممبئی میں ہی ابو بہار کے نام سے کاروبار بھی شروع کیا پھر 1962 میں دبئی تشریف لائے ۔
آپ کے انتقال کی خبر ملتے ہی دبئی میں مقیم بھٹکل کے کافی احباب اسپتال پہنچے اور میت کا آخری دیدار کیا ۔ بھٹکل مسلم جماعت دبئی کے صدر جناب محمد اشفاق سعدا سمیت جماعت کے کافی دیگر ذمہ داران نے بھی اسپتال پہنچ کر گھروالوں سے تعزیت کی اور مرحوم کے حق میں دعائے مغفرت کرتے ہوئے ان کے انتقال پر گہرے رنج و غم کا اظہار کیا۔ اللہ رب العزت موصوف کی خدمات کو قبول فرمائے اور ان کی بھرپور مغفرت فرماتے ہوئے جنت الفردوس میں اعلیٰ مقام عطا کرے۔۔ اٰمین۔
