بھٹکل: 20؍ستمبر(ایس اؤ نیوز) الیکشن کمیشن آف انڈیا  نےملک کے   رائے دہندگان(ووٹروں) کی سہولت کے لئے ایک خصوصی موبائیل ایپ ’’ووٹر ہیلپ لائن ایپ  ( Voter Helpline App)‘‘کا اجراء  کیا ہے جس کے ذریعے ملک کے شہری الیکٹرل  فہرست میں اپنا نام تلاش کرسکتے ہیں، آن لائن فارم کے ذریعے نام  داخل کرسکتے ہیں،   اپنی درخواست کی  status دیکھ سکتے ہیں اسی طرح ایپ کے ذریعے اپنی شکایات  بھی   درج کراسکتے ہیں۔  اس بات کی اطلاع بھٹکل تحصیلدار روی چندرا نے پریس  ریلیز جاری کرتے ہوئے دی ہے ۔

تحصیلدار نے بتایا کہ  ووٹرس  اور ملک کے عوام  گوگل پلے اسٹور سے ووٹر ہیلپ لائن نامی ایپ ڈاؤن لوڈ کرسکتے ہیں  اور اپنے موبائیل نمبر سے لاگ اِن ہوکر ایپ کا استعمال کرسکتےہیں۔ متعلقہ ایپ میں عوام اور رائے دہندگان کے لئے اپنا ووٹر بوتھ سینٹر  اور ووٹر شناختی کارڈ سمیت کئی انتخابی معلومات دستیاب ہیں۔

تحصیلدار نے بھٹکل کے عوام سے اپیل کی ہےکہ وہ متعلقہ ایپ  کو اپنے موبائل میں  ڈاؤن لوڈ کرکے  اس کا بہتر استعمال کریں۔