بھٹکل میں امراض قلب کا دو روزہ کیمپ کامیابی کے ساتھ اختتام پذیر؛ ماہر قلب ڈاکٹر علی فیضل نے کیا تعلقہ کے ڈاکٹروں سمیت بھٹکل مسلم خلیج کونسل کے ذمہ داران کے ساتھ تبادلہ خیال
بھٹکل 29/جولائی (ایس او نیوز) پڑوسی ریاست کیرالہ کے کالی کٹ سے تشریف فرما ماہر امراض قلب ڈاکٹر علی فیضل اور ڈاکٹر شاج الدین سمیت میترا اسپتال کی ٹیم کی سرکردگی میں بھٹکل کے معروف ویلفئیر اسپتال میں منعقدہ دو روزہ امراض قلب کی تشخیص اور علاج کا کیمپ اتوار شب کو کامیابی کے ساتھ اختتام پذیر ہوا ۔فری کیمپ میں دو سو سے زائد لوگوں نے اپنا چیک آپ کرانے کے ساتھ ساتھ اپنا علاج بھی کرایا سو سے زائد مریضوں کا ای سی جی اور ایکو کرایا گیا جبکہ کئی مریضوں کا بلڈ ٹیسٹ بھی کرایا گیا۔ پہلے دن قریب سو مریضوں کی جانچ سمیت علاج کرایا گیا تو دوسرے دن 125 سے زائد مریضوں کی جانچ کی گئی اور اُن کے لئے مناسب علاج تجویز کیا گیا۔ خیال رہے کہ کیمپ سے نہ صرف بھٹکل بلکہ مرڈیشور اور دیگر قریبی قصبہ کے بھی کافی لوگوں نے فائدہ اُٹھایا۔
دونوں ڈاکٹروں نے نہایت اطمینان کے ساتھ کیمپ میں شریک تمام مریضوں کی جانچ کی۔ بعد میں اخبارنویسوں سے گفتگو کرتے ہوئے ڈاکٹر علی فیضل نے بتایا کہ وہ اورمیترا اسپتال کی پوری ٹیم بھٹکل میں ساحل ا ٓن لائن کی دعوت پر تشریف لائے ہیں اور ان کی ہی ہدایت پر ویلفئیر اسپتال میں یہ کیمپ منعقد کیا گیا ہے۔ انہوں نے کامیاب کیمپ کے انعقاد پر ساحل آن لائن سمیت ویلفیر اسپتال کے ذمہ داران کا شکریہ ادا کیا۔
رابطہ ہال میں تعلقہ کے ڈاکٹروں سمیت گلف کے ذمہ داران کے ساتھ تبادلہ خیال: کیمپ کے درمیان شام قریب 5:30 بجے ڈاکٹر علی فیضل نے رابطہ ہال میں بھٹکل تعلقہ کے ڈاکٹروں سمیت بھٹکل مسلم خلیج کونسل کے ذمہ داران کے ساتھ بھٹکل کی طبی صورتحال پر تبادلہ خیال کیا اور اس بات پر سخت تشویش کا اظہار کیا کہ یہاں ایمرجنسی کی صورت میں مریضوں کا کوئی پرسان حال نہیں ہے۔جب مقامی ڈاکٹر نے اُنہیں بتایا کہ ایمرجنسی کے موقع پر مریضوں کو دو گھنٹے کی مسافت پر منی پال روانہ کیا جاتا ہے تو انہوں نے تشویش ظاہر کرتے ہوئے کہا کہ ایسی حالت میں مریضوں کو بچاپانا ممکن نہیں ہوگا۔ انہوں نے اس موقع پر میترا اسپتال کا تعارف اور پیش کی جانے والی خدمات کے تعلق سےمکمل جانکاری دی۔ انہوں نے غریب مریضوں کے تعلق سے توجہ دلانے پر بتایا کہ رابطہ سوسائٹی کے ذمہ داران یا بھٹکل مسلم ہیلتھ فائونڈیشن کی طرف سے سفارش کرنے پر غریب مریضوں کو ہرممکن تعاون فراہم کیا جاسکتا ہے۔
بھٹکل کی طبی صورتحال پر معلومات فراہم کرتے ہوئے بھٹکل سرکاری اسپتال کی ہیڈ ڈاکٹر سویتا کامتھ صاحبہ نے بتایا کہ سرکاری اسپتال میں الگ الگ طبی شعبوں کے نو ماہرین خدمات انجام دے رہے ہیں، سرکاری اسپتال میں کافی بدلاو کیا گیا ہے مریضوں کو ہرممکن تعاون فراہم کرنے کی کوشش کی جارہی ہے۔ امراض قلب کے تعلق سے انہوں نے بتایا کہ بھٹکل میں انجیو گرام کی سہولت نہ ہونے کی وجہ سے مریضوں کو منی پال یا مینگلور روانہ کرنا پڑتا ہے، انہوں نے یہ بھی بتایا کہ بعض امراض قلب کے مریضوں کا ای سی جی کرکے رپورٹ کو مینگلور کے ڈاکٹروں کو روانہ کیا جاتا ہے اور اُن کی ہدایات پر اگلی کاروائی ہوتی ہے۔ ڈاکٹر سویتا کامتھ نے آین آر آئیز کو بھٹکل سرکاری اسپتال آنے اور معائنہ کرنے کی دعوت دی ۔ ڈاکٹر سریش نائیک اور ڈاکٹر عالیہ نازنین نے بھی اس موقع پر اپنے تاثرات پیش کئے ۔
پروگرام کا آغاز حافظ امین ذُھیب دامودی کی تلاوت کلام پاک سےہوا، ڈاکٹر ظہیر کولا نے استقبال کیا، ابوظبی جماعت کے نمائندے آفتاب ایم جے نے رابطہ کا تعارف پیش کیا، بھٹکل مسلم خلیج کونسل کے جنرل سکریٹری جناب محمد یونس قاضیا نے ڈاکٹر علی فیضل کا تعارف پیش کرتے ہوئے بھٹکل میں طبی سہولیات کے تعلق سے اپنے تاثرات پیش کئے۔ مُبشر حُسین ہلارے نے نظامت کی، کونسل کے صدر جناب زاہد رکن الدین نے صدارت کی، اس موقع پر بھٹکل جماعت المسلمین کے قاضی مولانا اقبال مُلا ندوی، ویلفئیر اسپتال کے صدر جناب قادر میراں پٹیل، انجمن کے جنرل سکریٹری جناب صدیق اسماعیل سمیت کئی دیگر اداروں اور جماعتوں کے ذمہ داران موجود تھے۔ اس موقع پر رابطہ سوسائٹی کی جانب سے ڈاکٹر علی فیضل، ڈاکٹر شاج الدین اور میترا اسپتال کے مینجر مُرلی تھراوٹ کو میمنٹو پیش کیا گیا اور بھٹکل میں تشریف آوری پر اُن کا شکریہ ادا کیا گیا۔