کرناٹکا اسٹیٹ کرکٹ اسوسی ایشن کے زیراہتمام ہبلی میں منعقدہ کرکٹ ٹورنامنٹ میں بھٹکل اسپورٹس کلب کا شاندار پرفارمینس
بھٹکل:31؍جنوری(ایس اؤ نیوز)کرناٹکا اسٹیٹ کرکٹ اسوسی ایشن (کے ایس سی اے ) کے زیر اہتمام ہبلی گدگ روڈ پر واقع میدان میں کھیلے گئے تھرڈ ڈویزن کرکٹ ٹورنامنٹ میں بھٹکل اسپورٹس کلب کی ٹیم نے پھر ایک بار شاندار پرفارمینس پیش کرنے میں کامیاب ہوگئی۔ البتہ فائنل مقابلے میں بھٹکل اسپورٹس کو بیلگام کی آنند اکیڈمی ٹیم کے ہاتھوں شکست کھانا پڑا اس طرح بھٹکل ٹیم رنرز آپ یعنی ٹورنامنٹ میں دوسرا مقام حاصل کرنے میں کامیاب رہی۔
فائنل میں ٹاس جیت کر فیلڈنگ کرتےہوئے بیلگام ٹیم نے مخالف بھٹکل ٹیم کو 26.2اوورس میں 89رنوں پر آل آوٹ کردیا۔ بھٹکل ٹیم کی طرف سے اعجاز احمدناٹ آوٹ 39رن بنائے ۔ محی الدین شماز نے 11رن بنائے۔ بیلگام ٹیم کے ڈی انور علی اور ایم متھون نے فی کس 3وکٹ حاصل کرتےہوئے بھٹکل ٹیم کو کم اسکورس پر روکنے میں کامیاب رہے۔
بیلگام ٹیم نے صرف 19.2اوورس میں 5وکٹ کھو کر جیت کے لئے درکار 90 رن بنا کر چمپئین شپ کا خطاب جیت لیا۔ کیتیج کولہاپوری نے 23ناٹ آوٹ، اکشھئے جوئیکر نے 23، ایم نند کمار نے 22ناٹ آوٹ رن بنا کر اپنی ٹیم کو جیت دلائی ۔
اس سے قبل سیمی فائنل میں بھٹکل ٹیم نے بیلگام کی یواراج ٹیم اور بیلگام آنند اکیڈمی کی ٹیم نے ہبلی اسپورٹس کلب ٹیم کو شکست دے کر فائنل تک رسائی حاصل کرنے میں کامیاب رہے تھے۔