بھٹکل 23/اپریل (ایس او نیوز) ابتدا میں جن تین لوگوں کی رپورٹ کورونا پوزیٹیو آئی تھی اُن سب کا اسپتالوں میں علاج مکمل کرنے کے بعد دوسری اور تیسری رپورٹ نیگیٹو آنے کی بنیاد پر اُنہیں اسپتال سے ڈسچارج کیا گیا تھا اور اُنہیں بھٹکل کے کورنٹائن سینٹر میں رکھا گیا تھا، آج جمعرات صبح ان تین لوگوں کو کورنٹائن سینٹر سے بھی رہا کردیا گیا ہے۔
26 سالہ نوجوان جو مسقط سے کچھ دن دبئی میں رہ کر مینگلور آیا تھا اور اُسے مینگلور ائرپورٹ سے ہی سیدھے وینلاک اسپتال لے جایا گیا تھا اور اُس کی رپورٹ پوزیٹیو آئی تھی، پندرہ دن علاج کے بعد وہ صحت یاب ہوکر بھٹکل پہنچا تھا، اسی طرح 15 دن پہلے کاروار پتنجلی اسپتال سے صحت یاب ہوکر بھٹکل پہنچنے والے 65 سالہ اور 40 سالہ شخص جو بھٹکل تنظیم کے زیرانتظام ایک پرائیویٹ ہوٹل میں کورنٹائن میں تھے، ان تینوں کو آج کورنٹائن سینٹر سے بھی گھر جانے کی اجازت دی گئی ہے۔
خیال رہے کہ ہوٹل میں کورنٹائن کی مدت ختم کرنے کے بعد تینوں کے پھر ایک بار سیمپل لئے گئے تھے اور تینوں کی رپورٹ پھر ایک بار نیگیٹو آئی تھی جس کے بعد ہی ان کو گھر بھیجا گیا۔
پہلے تینوں کو آج صبح بھٹکل تعلقہ اسپتال لایا گیا، یہاں پر ایک الوداعی پروگرام رکھنا طئے تھا مگر بعد میں یہ کہہ کر پروگرام شام کے لئے ملتوی کیا گیا کہ ضلع انچارج وزیر شیورام ہیبار صاحب شام کو بھٹکل پہنچ رہے ہیں، لہٰذا ان کی موجودگی میں شام کو پروگرام رکھا جائے۔
فی الحال تینوں کو اُن کے گھر بھیجا گیا ہے ۔ اس موقع پر مجلس اصلاح و تنظیم بھٹکل کے جنرل سکریٹری عبدالرقیب ایم جے ندوی، یونس رکن الدین، امتیاز اُدیاور، نثار احمد ٹاپ، نصیف خلیفہ، بھٹکل اسسٹنٹ کمشنر بھرت، تحصیلدار کوٹرولی، ڈاکٹر شرد، ڈاکٹر سویتا کامتھ اور دیگر اسپتال کا عملہ اور محکمہ ہیلتھ کے آفسران موجود تھے۔